قصيدة ( كعده ) وزن شيعتي للزهراء ع

[الشاعر ابو لقاء البهادلي]

عذبوهه الزهره وهضموهه ** كسروهه بجور وظلموهه

علنو انذار ** ضد الاطهار

غصبو ورثهه وعادوهه ** كسروهه بجور وظلموهه

***********

يامه وصاهم نبينه ** وصه الاسلام بعترته

گال اهل بيتي سفينه ** يحچي بآلآمه وحسرته

همه للمنهاج اساسه ** والاساس الهم زهرته

وصه بكتابه والاهل * بس بيهم ايصح العمل * للدين مفتاح الامل

بيهم اسراره وفكرته

همه اسار الرساله ** بيهم انوار الجلاله

وسر التكوين ** وكل علم ودين

تاليهه الزهره يلوعوهه ** كسروهه بجور وظلموهه

***********

الهادي گال اخر كلامه ** وبعده بفراش المنيه

حاچه ابو الحسنين چلمه ** تحمل اسرار القضيه

گله يابو حسين تصبر ** لويطيحون الزچيــــــه

تدريهه حكمه امقدره * هالامر لوصار وجره * سيفك ابد ماتشهره

بالصبر تبقه الهويه

بالصبر تصبر تظهر علامه ** للنهج بيهه السلامه

تصبر للدوم ** ماتجزع يوم

تصبر لوبنتي يعذبوهه ** كسروهه بجور وظلموهه

***********

ذابت الزهره بمصابه ** والحزن اصبح طبعهه

منعو الاحزان كلهه ** ومنعو اعليـــهه دمعهه

ظلت بنوح ونواعي ** والحزن يشكي وضعهه

من ودع الهادي ورحل * هالحيل من عدهه نحل * والگلب من همه ذبل

تنتظر كسرة ضلعهه

تحملت ضيم ومصايب ** شافت الجور ونوايب

احزان ونوح ** تنزف الجروح

دمعات التجري منعوهه ** كسروهه بجور وظلموهه

********************

ملة اصحاب السقيفه ** مله غرگانه برذيله

حرفت الدين ومساره ** والغدر عدهه الوسيله

حاصرو دار النبوه ** وسطرو البضعه الجليله

ميراثهه كله انغصب * بالحقد جمعو هالحطب * والباب وجت باللهب

رادو تموت الفضيله

حيدر اتچتفه الوصيه ** علته عله خفيه

دفعوهه الباب ** والضلع انصاب

نهبو كل حگ وسطروهه ** كسروهه بجور وظلموهه

************

من كثر ظلم النواصب ** بالعمر فگدت املـهه

ونه وهموم ومصايب ** والهضم چانت تسلهه

ضاگت الضيم بمراره ** وتنتظر ساعة اجلهه

هالزهره بنت المصطفه * انوار عصمه ومعرفه * باجفانه نوح الغفه

جمره دمعات التهلهه

عاشت محرومه ومالومه ** ماتت مكسوره وملجومه

جور وآلآم ** من الظلام

هاذي الصديقه العادوهه ** كسروهه بجور وظلموهه

*********************

منهو گال الزهره ماتت ** لا كسر بيهه ولا علـــه

اليوم اوجهله سؤالي ** عالگبر ارد اني اسألـــه

هالگبر مخفي عليمن ** خلي ينطيني ادلـــــــــــه

مخفي گبرهه وشعجب * خليه ينطيني سبب * هالگبر ماعدهه عجب

منهو يرضاهه ويعقله

حجه يظل عالكسروهه ** يلعن بالناس الضربوهه

حجه واسرار ** ضد الفجار

عاللي آذوهه وقهروهه ** كسروهه بجور وظلموهه

**************