فخر يحسين يظل يومك

[خالد محمد مهدي الحجار]

(فخر ياحسين يظل يومك)

*************

فخر يحسين يظل يومك **عله الغبره علم نومك
خضيب ابلا غسل مدفون
عليك تصب دمه لعيــــون
*******************
علت من يثرب الرايه تجد بينه **عله هامك على كل هام والينـــــــــه
نعيش بفضلك أحرار أبراضينــه **منو مثلك حيا بدمه ذكر دينـــــــــه
يشع الغاضريه النــور
الكرامتنه امان وسور

وحبك بالگلب مكنون
***************
أنبنت بسم الله وبروحك مساجدنــه**عله التربه الرواها دمك سجدنـــه
سعينه بكل عزم واصرار الك جدنه**رضا الله رضاك عليه أوجدنه
سندنه تبقه يامظلوم
عهدنه وياك لآخر يوم

رضاك الشيعه يتمنون
***************
الك عند الله شان الماحصل مثلـــه **مناره وگبه صارن للگصد قبلــــه
عامود الدين دمك من روه اصلـــه **يوميه علينه بنورك ايهلّــــــــــــه
طبيب وتربتك وصفــه
عليل بحضرتك يشفه

ويرد بحاجته ممنون
**************
الك مأتم وسط گلبه الــــذي والاك **يمنّي نفسه دنيه وآخره ويّــــــــاك
سفينة رحمتك ترسي علبر حماك**بنبض گلبه ودموع عيونه يترجاك
يبع الروح والمهجـــــــه
تسمعه البسمك أترجّه

ابد ماخيّبت لظنون
***************
الحزن لولاك ياحُر ماله كل معنه** الدمع يجفينه لوله الغيرك أدمعنــه
الدليل انته اذا مو ثورتك ضعنـــه **يبو صدر الرحب يل كلنه يوسعنه
تظل الشيعتك مگصد
ومحبتك دوم تتجـــدد

عهد لمحبتك يوفون

*************

[عاشقة ام الحسنين]

اللهم صل على محمد وال محمد وعجل فرجهم ياكريم
أحسنت على الكلمات المميزة
يعطيك العافية

[خالد محمد مهدي الحجار]

ممنون لفيض ودعاؤكم المبارك
شكرا // ممنون

[ندى الحزينة]

أنبنت بسم الله وبروحك مساجدنــه**عله التربه الرواها دمك سجدنـــه
سعينه بكل عزم واصرار الك جدنه**رضا الله رضاك عليه أوجدنه
سندنه تبقه يامظلوم
عهدنه وياك لآخر يوم

رضاك الشيعه يتمنون
اي والله رضاك ي مولاي
عطر الله انفاسك وبارك فيك

[خالد محمد مهدي الحجار]

ممنون لهذا الفيض المبارك العذب
مع الود والاحترام
لاتنسونا بالدعاء
شكرا // ممنون