تويت
السلام عليكم ورحمة الله وبركاته
عظم الله لنا ولكم الأجر بمصاب الأمام الحسين عليه السلام
احبائي الحمد لله الذي رزقني اول قصائد هذا العام قصيدة عن واقعة الطف
أنا لم أرى طف الحسين
لكني رأيت طف العراق
***
صح اني بحلم وبچفي الطفوف
لچن اعليه واجب أنصر الدين
على جيش النصاره اكتبت الاحرار
وكتبت اعله الكفر جيش الملاعين
وعلى صوب الشريعه ثنين خليت
زينب أولاً والثاني الحسين
واذا تسألني ليش انطيك الجواب
لجل عباس يوگع بين الاثنين
وخليت الزجيه بصوب الحسين
حتى بنص حظنهه يغمض العين
وجبت أم البنين بصوب عباس
لجل يغفه بحظنهه ابلايه چفين
ولأن كفره الرضيع تذبحه السهام
بدلت السهام اني بقرائين
ولجل تدري العليله بحال العيال
جبتهه الكربله بنص الميادين
ولأن تشهگ رقيه بشام الانذال
طعنت الشام بنواع السچاچين
ولجل ما يخطي سيف حسين الرگاب
على ارگاب الكفر صغت الشياطين
ولميت الصبر من گلب الايتام
وللحوراء سلمته بوصل دين
وخليت الفرات يطوف الخيام
وعلى اشفاف اليتامه يحط نياشين
ولأن ما ريد خد الحر ع الرمال
تحت خده افرشت ورد ورياحين
ولأن بحسين عابس صار محنون
دعيت الله يحطني اويه المجانين
ولأن وهب المسيحي بصوب الانصار
قدست الصليب النصرت الدين
وتحت جسم النصاره افرشت الورود
حتى اعله الورد تغفه الميامين
ونيمت النصاره وأني فزيت
من حلمي الگلب كل الموازين
ونفس حسين شفت اعراقنه اليوم
لا ناصر أله اولا واحد يعين
هذا الحظنه دافي ويجمع الناس
هظيمه اولاده بحظان الجوارين
هذا الما قفل المضيف لحظات
ولا بردت گهوته البلفناجين
أبو الخيرات هذا شلون ترضون
نص شعبه يتامه ونص مساكين
مو ذنب الشعب صدگوني والله
الذنب معروف برگاب السلاطين
ردناهم يشبعون اليجوعون
وينسونه المرار وتعب السنين
ما قصرو شبعونه لچن بيش
شبعونه بصورهم عل حياطين
تعليق