تويت
رثاء الإمام علي إبن الحسين السجاد عليه السلام
علي السجاد أبو الباقر أنا يا شيعتي مظلوم
و انا فوق المرض لني تقطع جبدي المسموم
و ما ظل بالخلق مثلي حمل ضيم و صبر و اهموم
و لا دمعي نشف ساعة من طف كربله و لليوم
و يا جرح البعد يلتام و حيلي من المرض مهدوم
شحجي و شقولن عن محنتي لوعة مصابي لو حسرتي
دم و دمع هليت
*********
اشما اريد القلب ينسه حنين القلب ما يقدر
و الضيم السده اعلية شنسه منه شتذكر
و كل لحظة اليمر قلبي يقوم من الألم يشغر
عفاني اشلون اليَّ اعيون شافت ذبحة الأكبر
شبيه المصطفى الهادي و مثل هيبة علي حيدر
قمت بجفوفي يا شيعة ألم بجسمه الموذر
و لمن حطنته يا لهفتي حيلي تهدم من ونتي
دم و دمع هليت
*********
صخر ما يقدر يحمله ضيم الذي اتحملته
و ما ظن شافته كل عين مصاب بعيني الشفته
نهار العاشر بعاشور يوافيني الأجل ردته
بطيحة عمي العباس صبر العندي ودعته
لون حيلي يساعدني شطت للعلقمي اقصدته
و مجان اجفوفه اقبلها و من عينه السهم زحته
لا أقدر أنزل من ناقتي بيدي السلاسل و برقبتي
دم و دمع هليت
*********
جثيرة اجروح البقلبي شضَمد لا جرح و اثنين
حين الشفته متحير بالحومة ابوية احسين
أقوم و ما يعينني يا شيعة جلت الرجلين
و اشوف بسم المثلث صارت جبدته نصين
و من رد المهر خالي بعد ننطي الوجه لا وين
و اشلون أدافع عن عمتي مابية اقومن من علتي
دم و دمع هليت
*********
لون جرح القلب ينراف جرح اعيوني شيروفه
و فوق الرمح راس احسين امخضب بالدمه اتشوفه
و زينب بت علي الكرار فوق الهزل مجتوفه
و الأصعب بعد و اكلف حين الطبت الكوفة
و ا لدار الوصي اتصد له دار التشهد اضيوفه
صحت و نخيته من حرقتي ادركني بوية و بحالتي
دم و دمع هليت
*********
تشفه اجروح البقلبي لو تشفه و صدق تلتام
يظل منها جرح ينزف و هذا الجرح جرح الشام
و يظل كل و كِت يلجمني يهيّج الدمع و الآلام
شفت اعيال مجتوفه أسيرة بولية الظلام
و من ضرب السياط اتلوع أسمعها حرم و ايتام
عقب الخدر و الهيبة يا وسفة بخرابة اتنام
جني انوحن و بعلتي ظليت أنادي و ين اخوتي
دم و دمع هليت
تعليق