المساعد الشخصي الرقمي

مشاهدة النسخة كاملة : أبوذيات 2


نجمة البصره
03-06-2010, 09:29 PM
ودي اكعد كبالك واحضن واشم بيك ...
و ادك حبي بقلبك وشم بيك ...
من كل دكه اعرف شبيك وشمبيك ...
احسن من اسألك واتظم علييه ...

حبيبي شكد وفي ومخلص وصادق ...
و اوعدك ما احب غيرك واصادق ...
وحق المهدي والباقر وصادق ...
يظل عشكك للموت بيه ...

فيض بحور يجيني موجك حبيبي وانهار ...
ويذوب الحيل من اسمع انفاسك وانهار ...
بخيالي عايشه طيوفك ليل ونهار ...
وادعي من ربي يجمعنا سويه ...

ينخر بالكيان الحزن مثل ما تنخر بالنخل ارضه ...
ويخلي الوحيد بحيره لا طايل سما ولا ثابت بارضه ...
ريتك حبيبي باحضاني بيك اقنع باقي العمر وارضه ...
واجج بنارك لهيبي و نحترك بيها سويه ...


أرياكي شما ردت تحله تمر بيك
ويعثك الشيص حسبالي تمر بيك
أجدامي النوب لو رادت تمر بيك
أكصصهن وأكصص حتى اديه



نص احترك من هجرك ونص طاف
وغرك نصي ابحر حبك ونص طاف
يريت المدرسة ترجع ونصطف
وابدلك بالعلم واخذ تحية



عجب مامر عزيز الروح بس لاح
رماني وردت ارد السهم بس لاح
لجيبك لو تصير اليوم بسلاح
وتداوي جروح علاتي الخفيّه



حبيبي اكل فلافل ونته باجه
شوكت تكعد كبالي ونتباجه
ولك بسمار كلبي ونته بجه
وبساميرك عوج ردهن بديه



وكع قلبي بغرامك ماتشيله
وجرح شوك البيه ماتشيله
اخابر وانت تسمع ماتشيله
ولك هالروح ماتحمل اذيه


البشر لو مات كلبه ماتشوفه
وضمير الناس جنه مات اشوفه
عسن عين اللي حكلهه ما تشوفه
عمه اسود صابهه لحد المنيه

يحن كلبي على حبك من احبك
واخذ زهوة شبابي مني حبك
انشدك ياهو الاكثر مني حبك
حته بهالسهوله تخون بيه

البحر من ماي شفتك شفته ورده. $$$
وشفت الورد مثلك شفته ورده. $$$
الاكو والماكو يمك شفته ورده$$$.
واشوف الشوك بيدك مزهريه.$$$


بعد لتكلي عنك منتكلي.
وعلي مفروض امرك منتكلي.
اشتريد اتصير كلي منته كلي.
ولا خليت مني اشويه ليه


شكثر بأسم الأوده لجلساني0
بمحنته نار كبره لجله ساني0
على اكلوب الشماته لجلساني0
وركبه ونص كعدتي اتصير هيه0


عفينه ولاعرفنه اسباب .. شطاك
وعطشنه وماشربنه ماي .. شطاك
كلي الوهدناك اتخون .. شطاك ؟؟
وشخذ منك ثمن جرمك عليه ؟!


اسلم ماترد مالك .. عسلماي
وبيك ايدير من هجرك .. عسلماي
انشدك عن لمى اشفافك .. عسلماي ؟؟
حليب ودرته اشفافك عليه

رماد الود على افراكه .. ولعناه
وكلبنه اشما سكن شوكه .. ولعناه
شلي ببليس اسبنه .. ولعناه
غواني الحب شله الشيطان بيه ؟؟


مشه والروح غفله .. راودتني
وعليه العين تربي .. راودتني
زليخة بوجه ثاني .. راودتني
عن نفسي وخذت ثوب العليه


كصير الدرب مالك .. ماشعلني
وانا ظنتي ابجهنم .. ماشه عني
طفيت وغير شخصك .. ماشعلني
قيامه لوحدي سويت بيه


متى منياي يحبابي .. سنلها
ويوم البالجفه روحي .. سنلها
دويت ونار فركاكم .. سنلها
وحركت الفزعوا ايطفون بيه


ورمشاك.......
وحق كلبك وعينك ورمشاك
اضل طول العمر امشي وره مشاك
عليل ومرضي ورم شاك
تطيب جروحي من تمد ايدك عليه



وسر بيه.....
افـــــــــرح لــو شفـــت وجهــــك... وســــــر بــــــي ^^
وحبـــــــــك ثابـــت بكلبــــي ...وســــــر بــــيــــــه ^^
شمــــــــا طـــــال الــــدرب امشـــــــي ...وســــر بـــي ^^
ابعــــــــث الـــــــــروح لعيـــونـــــــــك هـــــد يـــــه ^^



ياسر......
بعسر حالي ابد ما اكول ياسر
وعلى اسراري اكلك بعد ياسر
اذا عمار يمه انكتل ياسر
انكلب حمزه وتعال الحك عليه


تراني.....
نحيل الجسم من بعدك تراني
واريك يوم بعيونك تراني
افكر بيك كل ساعه تراني
افكر بيك والبعد يصعد عليه




ودكلك.....
الك ما نبض كلبي ودكلك
واطحن بالحجي ناعم وادكلك
بيوم السافرت كمت ابجي ودكلك
جيتك بنص الليل يم بابك ودكلك
دكلي شوكت اتحن عليه



بالاه.....
يا وكتي انكضت وياك بالاه
ودمع العين ثوب الصبر بلاه
لو كلي اصير جروح بالاه
اكابر وما امدلك اذيه



ولمساك.....
انطرك دوم من صبحك ولمساك
واريدن بس ابوسنك ولمساك
هجرك صم يا مدلل ولمساك
وهسه انت جاي وتتكبر عليه



ويلين......
حرت وين اشرد من الدهر ويلين
وعلى اشفافي صفه اليا ويل ويلين
يخضع كل قوي للزمن ويلين
الفخر للاريحي المابي اذيه



وياج......
هسه انه امنت بالشوك وياج
واحذرج من كلام الناس وياج
بكثر ما وج دليلي العذل وياج
وتعالي انعيد عشرتنه سويه



حسبه......
جفى جرحي ولا من محب حسبه
وكضى الليل حسبه بثلر حسبه
خلص عمري وتعال وياي حسبه
وحرام ان جان الف0رح مر عليه



سني....
العمر تيهته وضاع سني
كبرت ومن كدام طاح سني
جنت شيعي وجيف احبك صرت سني
اجتف بالصلاه غصبا عليه



مره......
صدكنيي جذب من كال الموت مره
وصدكنيا ليحب شما تعذب حلو مره
واتمنى ابوس اشفافك كون بس مره
وذا تشتاك للغالي تشوف الموت كم مره
واتمن تحس بيه فرد مره
تعال ارجوك واتلاحك عليه



وحر بي......
كلبي انت ملكته وانت حر بي
عليل وطبي عندك وانت حر بي
يا كاس الاشربه وانتحر بي
شربت حبك هو العم عليه



من عبيدك.....
تكلم وكول من عبيدك
وهذا الهوى اليسري منعه بيدك
اغاتك واريد اصير من عبيدك
ولو ذله على ابن العراقيه


بعداك.....
حبيبي ما تحب النفس بعداك
عديت شحصلت يا ترف بعداك
نخيت الصبر ويه الجان بعداك
وهسه انت الي تخون بيه


ولا ساف.....
الندم ما ينفع بزعلك ولا ساف
ولساني ما غلط مثلك ولا ساف
جنت عالي واشوفك ولا ساف
جبل لو تصير ما تعله عليه


وصله.....
يا صاحب هاك اخذ مكتوب وصله
واريد اعرف عمامه منين و اصله
كلبي عليك صار 12 وصله
كل وصله تصيح جيبو اليه


ملكاك.....
ترف لشوكت ادور عليك ملكاك
عزيز وعبد لليهواك ملكاك
تكول اهواك وانه اكرت ملكاك
حرام ان يوم حسيت بيه


وذاني......
حجي العذال عذبني وذاني
وباب الكلب سديته وذاني
احبك يا بعد روحي واذا اني
هجرتك كول بالحب مو وفيه


بسمار......
ترف ردناك لينه تمر بسمار
جفيت وصرت اعيش اهواك بسمار
بكلبي اندك غرامك مثل بسمار
وتعبني وبسمر عيوني عليه


تعدله.......
عليمن تحسب اغلاطي تعدله
الميت بالبجي شضن تعدله
العوج عوده صعب ظله تعدله
يظل اعوج لمه تلفه المنيه


ولا عيب.....
صافي وخلل ما بي ولا عيب
ولا عرف الحجي الملوي ولا عيب
حبيبي لا خجل يعرف ولا عيب
فرق البيني وبينه بعد الثريه


ونهار.......
ذجرك ما نسيته بليل ونهار
وتجري دموعي بحور ونهار
ابكثر نوحي دليلي انعاب ولنهار
وعلى افراكك تروح الروح ليه


وعدي.......
حسابي ما غلط مره وعدي
ودومك تغلط بحقي وعدي
السوالف شو كله يمي وعدي
عليمن خايف اضبطهن عليه


مر علينه......
ترف يهل تمشي بدربك مر علينه
عزيز ونرى فراكك مر علينه
انا بعز نومي طيفك مر علينه
دخيلك لا تكطع الوصل بيه


وحن لك.....
الدهر اعلن حرب ضدبي وحن لك
وبجفني اتغضب دمعي وحن لك
انا مشتاك لدادك وحن لك
حنين ادريس للجنه البهيه


حنيت........
سبع اضلوع يوم اهجرت حنيت
وبهجركم لا تضن لحفوفي حنيت
تصدعني والعد الغير حنيت
السبب تهجرني وقسى عليه


وردك.......
يا فلان ادري بنبع الشوك وردك
وادري من التحبها النوح وردك
العمر بستان واحلى الور وردك
ووردك تذبل بس عليه



عاشراني........
عاشراني حلو وبطبعي عاشراني
واظل دايم طول العمر معاشراني
اذا تسعه الحبوج والعاشراني
اذن الرقم 11 والله خطيه
تحياتي ويارب تعجبكم

محـب الحسين
03-06-2010, 09:43 PM
شكرا جزيلا اختي الفاضله

تم تعديل العنوان
يرجى تجنب العناوين المزخرفه

نجمة البصره
03-06-2010, 09:45 PM
منور استاذ اسعدني مرورك :65: