اكثر من 200 دارامي ... يخبلن

[نجمة البصره]

دارمــــــــــــــيات
=============
لاتگطع اترجاك
سمعني كلمة
والله الهوه بلياك
مايسوه اشمه
==============
لاتظن يوم انساك
يالمني بيه
ماي انته ومباريك
بثنين اديه
===========
سهران افكر بيك
ماشايف النوم
وتخيلت مرسوم
وجهك بالنجوم
=============
ينراد اخلي اعيون
بعيوني ذني
حته اگدر ابچي اعليك
من تمشي عني
================
هدني التعب يفلان
والهم أكلني
من غيبتك لليوم
محد فگدني
================
نمت آنه عالتبريد
حسبالي أغفه
نار المحب بحشاي
ماترضه تطفه
==============
أصفن واعد انجوم
وايدي اعله خدي
هم غربة هم افراگـ
هم ولفي ضدي
==============
للدوم اظل وياك
يالطيبك ايفوح
ولخوتك ماعوف
لو تطلع الروح
==============
غيرة وكرم واخلاص
كلهن صفاتك
واتعب شوصف بيك
يالطيبة ذاتك
==============
صدگني آنه اوياك
روح بوسط روح
گبلك أحس بالآه
لو إنته مجروح
==============
تدري شوكت أنساك
وبگلبي اتهون
من تسمع آنه اهناك
بالنجف مدفون
==============
حسبالك آنه انساك
يالتسوه كلشي
تسوه العدل والمات
والتوه يمشي
==============
عبوة وزرعني الشوگـ
صرت اعله دربك
واعذرني لو طگيت
فجرني حبك
==============
تدري شوكت أنساك
ياأغله الاحباب
لمن يجيني الموت
واتغطه بتراب
==============
لعيونك الحلوات
صدگني أشتاگـ
ماأصبر بلياك
واتحمل افراگـ
==============
كون الجمال البيك
أتمنه بيه
حته آنه من اشتاگـ
أصفن عليه
==============
غالي وعزيز اهواي
وفراگك اهموم
وعيوني لو تنساك
أعميها للدوم
==============
حاير شحط للعين
وامنعها منكم
صبح وعصر وغروب
تسألني عنكم
==============
عيون البشر حلوات
بس عينك احله
خظرة وتسلب اعقول
لو تحط كحله
=============
ظلمة وتريد الناس
توصل للبيوت
بس آنه اريد الگاك
هالساعة لو موت
==============
گالولي اجاك العيد
چا ليمته اتهيد
عيد اليمر بجفاك
ماينحسب عيد
==============
تدري آنه گبل العيد
عاشورك اوياي
حاسمها لو مو عيد
ماتضحك اشفاي
==============
يم بيتي بيتك كون
واشمرلك العين
تشبعها منك شوف
وتردها بعدين
==============
صايم على فرگاك
غيرك فلا اريد
أفطر أنه بملگاك
وك شوفتك عيد
==============
أتعارك اويه النوم
بلكي اغفه وانساك
تاليها صورة وصوت
إبحلمي الگاك
==============
باخر نفس مخنوگـ
واتمنه اشوفك
واعذرني بس الموت
يجبرني اعوفك
==============
نامت اگلوب الناس
بس گلبي گاعد
والضغط من فرگاك
كل ساعة صاعد
==============
للموت اضل وياك
ماابدل الراي
وافدي الجسد والروح
لليوفي وياي
==============
بالگلب ساكن دوم
مايمكن انساك
يهجرني حته النوم
من يمر ذكراك
==============
إرهابي ليش اصير
مو إنته حباب
فجرت گلبي اشبيك
سويته عطاب
==============
الخوة شحت حيل
صارت قليلة
لكن وحگ عيناك
خوتنه اصيلة
==============
ليل وشتى وبردان
ماتدري حگك
ماأدفى حته بنار
أدفه امن اشبگك
==============
أصفن واحاچي الروح
وين احنه چنه
هم ترجع الأيام
ويلتم شملنه
==============
ناذر نذر لو جيت
وتشوفك العين
أگعد أجدي اسبوع
اباب الحسين
==============
سيطرة بدرب اهواي
وهمية أنصب
حته امن اشوفه ايفوت
أخطفه وأهرب
==============
شريان الك بالروح
يمشي بغزارة
وحبك بگلبي دوم
ماتطفه ناره
==============
مل مني حته الليل
والگمر شاهد
بس بيك افكر دوم
للفجر گاعد
==============
مذنب أظل بهواك
كون انته قاضي
تحكمني بالإعدام
صدگني راضي
==============
اتريله الك بوسات
تحملها العيون
حضر خمس عمال
بس اليفرغون
==============
أخطب بنص الناس
والساحة تشهد
وافرض حضر تجوال
لو غثك احد
==============
صدگوني مامرتاح
يالروحي عدكم
لو أدري هيچ اشتاگـ
ماعاشرتكم
==============
الروح اذا تنساك
ميتة اعتبرها
وبيسرتي ويمناي
أحفر گبرها
==============
مسكنك روح الروح
ياشمعة العين
ومن كل خطر يحميك
مولاي الحسين
==============
للصحبة أهدي الروح
وعيوني الاثنين
والعمر فدوة ايروح
للصاحب الزين
==============
دايخ وافكر بيك
وعن بالي متروح
أمشي وردمني الباب
حسبالي مفتوح
==============
صابر على فرگاك
گلبي اليريدك
والصبر يالمحبوب
مفتاحه بيدك
==============
لاتسأل اعله الحال
خليها سكتة
تسأل على المكتول
والكاتل انته
==============
لو ممشة عشر اسنين
أمشيها واكثر
ماأتعب وماجوز
من حب الاسمر
==============
روحي بسرير الموت
تنشدني عنك
وتگلي ليش اهواك
متبري منك
==============
يالبلگلب مشتول
وبروحي مزروع
افراشك النبضات
وغطاك الظلوع
==============
ياجوري يانعناع
يانبع صافي
لاخر نفس بالروح
ليك ابقه وافي
==============
غير الوفه يهواي
ماعندي غاية
وآنه اعله عهدي اوياك
حد النهاية
==============
كون الفرح ينباع
واشريلك العيد
يالشوفتك عيدين
عيد احله من عيد
==============
أسأل أضل اعليك
حد گطع الانفاس
غالي وتضل بالروح
تاج انته عالراس
==============
تبقه انته تاج الراس
تبقه انته راقي
يالريحتك بغداد
واسمك عراقي
==============
كون الحبيب ايصير
بالحمزة دنگة
وبحجة الزوار
كل ساعة اشبگة
==============
صح البشر حلوين
بس الك ميزة
تدخل گلب تهريب
وبليه فيزة
==============
أتمنه هالطلاب
كلهم ينجحون
چيفن حبيب الروح
ويه اليدرسون
==============
گتلك تفضل فوت
كل قصدي للبيت
رأسا دفعت الباب
وبگلبي طبيت
==============
تمثال الك بالعين
شايلته الجفون
نافورة منه وبيه
دمعات العيون
==============
من غبتوا ولهاليوم
أحلامي بيكم
وصدگوا مثل هوار
أبچي عليكم
==============
ظلمة ودرب عاثور
والدنيه تمطر
لغيرك فلا تانيت
بس الك أنطر
==============
طيفك نبض بالعين
كل ليلة ضيفي
بعيونك الحلوات
هم يمر طيفي
==============
أهلا وسهلا بيك
صارت قديمة
أفرشلك العينين
والگلب خيمة
==============
اشما تگول الناس
عندي انته الاول
سو كلشي بالدلال
ياحلو مخول
==============
دم الگلب بجفاك
فاض من العيون
مو حب طبيعي اهواك
بيك آنه مجنون
==============
أنشد عليك الروح
مدري اشتگلي
مدري انته نص الروح
مدري انته كلي
==============
لاتظن يوم انساك
لو يوم اعوفك
صدگني ابيع الروح
بس كون اشوفك
==============
كون المحبة اصير
مثل السياسة
حته اليخون ابساع
ينگطع راسه
==============
كلمن يگول انساك
گله انته مجنون
هو الگمر ينشاف
من غير العيون
==============
كلمن ينام الليل
مايعرف ايحب
آنه بحلات النوم
وعيوني اتصب
==============
لو گلبي عافك يوم
سويته تكه
وللمكتب استدعاء
بالبطة اصكه
==============
يهتز يريد ايطيح
گلبي اعله فرگاك
لايرضه جرحي ايطيب
لايرضه ينساك
==============
دورت بالصفنات
وحده انته منهن
لمن صفنت النوب
صرت انته كلهن
==============
دورت كل الناس
ماكوا بحلاتك
والعسل كله ايروح
فدوة لصفاتك
==============
ريت الأصابع هاي
إيصيرن اشموع
مشعولة لجلك دوم
للأبد متموع
==============
حط حرس حط اسلاح
حط قوة يمك
لازم أجيك اليوم
أوصل واشمك
==============
الصحبة صحبة موت
لتظن اعوفك
ماتدري آنه اشلون
مشتاگـ اشوفك
==============
كون انگلب صمون
واسكن فرنكم
وكل ماتمسني النار
أصرخ أحبكم
==============
بالحلم شفتك طيف
چذبت العيون
نايم وافكر بيك
من اگعد اشلون
==============
كلمن يگول انساك
صدگني چذاب
حبك جرح بالروح
ينزف ولاطاب
==============
الدهر لو وازاك
خذلك معلمة
جيبك تترسه افلوس
وابنك تعلمه
==============
مفخخ صرت بهواك
صرت انتحاري
تفجيري بالريموت
بيدك قراري
==============
بدلالي اضمك حيل
وبوسط الضلوع
من عنده تاكل زين
لو مسك الجوع
==============
لاتظن حي وانساك
وانسه الليالي
جثه آنه بالتابوت
وانته اعله بالي
==============
أقره وافكر بيچ
وانسه امتحاني
وبيچ انتي مدري اشلون
الله ابتلاني
==============
گصصني ذبني بطين
واسحگ عليه
تصرخ تصيح اهواك
كل وصلة بية
==============
أتمنه عندي اجناح
وكل ساعة امر بيك
معذبتني هاي الروح
بس تسأل اعليك
==============
كون الدمع ينشال
وبعيني اخليك
وكل ماأحن واشتاگـ
أبچي وأحاچيك
==============
أخسر عليك الروح
ماضني خسران
للخوة كلشي ايهون
ياأغله إنسان
==============
كون آنه ابيعن غاز
بس للأحبه
وكل ماأمر اعليه
أترسله دبه
==============
لوغبت عن العين
أحسبها شدة
واحرگـ بدمع العين
وجه المخدة
==============
مشتاگـ الك مشتاگـ
وبگلبي حسرة
بيه كسر يهواي
وانته التجبرة
==============
بالليل افز فزات
وابچي اعله حالي
كله بسبب فرگاك
اشگد انته غالي
==============
من كثر مامشتاگـ
تيهت نفسي
أجرت الامريكان
حسبالي تكسي
==============
من كثر مامشتاگـ
واشتهي الجيه
أجرت الامريكان
حسبالي كية
==============
تدري شكثر تشتاگـ
لطيوفك العين
ابكثر ماتشتاگـ
زينب للحسين
==============
تبقه بوسط هالروح
تبقه انته ظلعي
ولو أحسب الغالين
إنته اغله ربعي
==============
مو من مرض ونيت
من كثر الفراگـ
صدگني گلبي اعليك
كل لحظة يشتاگـ
==============
والحجر واهل البيت
والكفل أخته
والله امن اعد اعزاز
أولهم انته
==============
رمش برمش شديت
مانامت العين
تسهر والك تشتاگـ
مطلوبة الك دين
==============
الولد لوفطموه
يبچيله يومين
بس انته من اتغيب
أبچيلك اسنين
==============
الدهر لو وازاك
طگلك اجگيره
شتگدر تسوي اليوم
شنهو التغيره
==============
الدهر لو وازاك
إزرع طماطة
وازرع بصفها اخيار
واشبع زلاطة
==============
كونك امرايه اصير
ومعلگينك
وكل ماأمر اعليك
عيني بعينك
==============
نوم المخدة ايلوگـ
للباله خالي
ومنين اجيب النوم
وانته اعله بالي
==============
بجاه الله والعباس
وبجاه الحسين
يحفضك رب الكون
من نظرة العين
==============
صح انته عني ابعيد
من تحسب امتار
لاچن وسط هالروح
مبنيه الك دار
==============
وحدك سكنت الروح
وحدك معشش
بگليبي دور زين
دور وفتش
==============
بالگلب بالشريان
بنص روحي اخليك
حزب الله يرضون
نصر الله اسميك
==============
ضلمة ودرب عاثور
وهم حظر تجوال
أوصل واجيك ازحوف
واشكيلك الحال
==============
إنته التضل بالروح
والباقي فلسين
حبك نبت بحشاي
أقسم بالحسين
==============
كون الگلب ينصاغ
محبس ودزه
يبقه إلك تذكار
لجل المعزة
==============
فخخت روحي اليوم
كل هذا لجلك
ولو مارضوا ينطوك
أنفجر بهلك
==============
كون انته هسه اهنا
كون انته يمي
كون انته بالشريان
توزعلي دمي
==============
متعجبه النسوان
براغب علامة
داخل حسن يسواه
ويسوه عمامة
==============
أهمس بإسمك دوم
فضحتني الاحلام
بطلت حته النوم
وبليلي مانام
==============
آسف يبعد الروح
تعذرني ريتك
عندي ظروف اهواي
بس مانسيتك
==============
الگلب ماينساك
بس هذا عيبه
صدگني من فرگاك
طلعتله شيبه
==============
هاك اخذ كلشي اتريد
شتريد اخذ هاك
هوه العمر فلسين
يسوه ابلياك
==============
أهلا وسهلا بيك
حيل الگلب صاح
لو ماتلزمه اضلوع
من فرگتك طاح
==============
وينك حبيب الروح
مشتاگـ اضمك
صح امشي بين الناس
بس روحي يمك
==============
إنته احله كل الناس
ياهو احله منك
حته الجمال اليوم
يسألني عنك
==============
صبح وعصر وغروب
وبهدوة الليل
وبكل دقيقة الروح
تشتاگلك حيل
==============
كون انگلب طلقات
وادخل بگلبك
واكتب على الشريان
دمرني حبك
==============
ظلمة وحظر تجوال
وامريكي بالباب
ولو تنگلب طلقات
أتعنه الاحباب
==============
ظلمة وحظر تجوال
واليطلع ايموت
بس اليحب اهواه
يتحده ويفوت
==============
ظلمة وحظر تجوال
والبطة تفتر
واليطلع ايصكوه
لو جده يحظر
==============
ظلمة وحظر تجوال
والشرطة تفتر
أوصل واجيك ازحوف
يالمعدنك در
==============
كون الگلب بي باب
تگدر تشوفه
ولو شفت غيرك بيه
حگك تعوفه
==============
ثاري البنات اهواي
مثل الچفافي
بيهن تخون ابساع
وبيهن توافي
==============
ثاري البنات اهواي
مثل الطماطة
بيهن تخيس ابساع
وبيهن زلاطة
==============
أگعد بتالي الليل
وادعي بصلاتي
ياربي بعد اهواي
شلي بحياتي
==============
من گلبي اخذ لحمات
خافنك اجوع
ولو مالگيت اشياش
شيش بالضلوع
==============
صح انته عني ابعيد
بس على بالي
واقرب إلي من الروح
حبك يغالي
==============
للموت اضل اوياك
مايوم املك
مابيه حيل افراگـ
من هسه اگلك
==============
تمرضت عشر امراض
واسهلهن السل
ولو بعد عشر امراض
منك فلا مل
==============
گلبي اللي چان بخير
وبخير نبضه
من فرگتك سكراب
بالسوگـ اعرضه
==============
بين الگلب والروح
إهنا أخليك
واكتب خطر ممنوع
محد يمر بيك
==============
ناسي ونسيت الناس
بس مانسيتك
ولوغبت عن العين
بالدم لگيتك
==============
روحي وعيوني اوياك
والگلب يمك
يمشن سوه بشريان
دمي اويه دمك
==============
لوتدري هاي العين
شمسويه بيه
كل نظرة بيها اليوم
شفت المنية
==============
من الصبر مليت
والصبر ملني
ماأگدر بلياك
يمك دخلني
==============
الگمر من وجناك
شع وتنور
وحته الورد والياس
منك تعطر
==============
مو مشكلة النفطات
ولا مشكلة الماي
مشكلتي ياهالناس
ماشايف اهواي
==============
أسأل عليك الناس
وين انته غايب
الگلب من فرگاك
شاف المصايب
==============
أتمنه اصيرن طيف
بالليل اجيكم
حته ابقه طول الليل
حارس عليكم
==============
كلما يمر الليل
والنجم يظهر
أذكرك واشتاگـ
واتمنه تحظر
==============
روحي اويه روحك دوم
شذرة اويه محبس
مصيوغه الك مخصوص
الچفك وبس
==============
بالجنة من طبيت
الحور اجني
صحت آنه اريد اهواي
شلي بهذني
==============
عطشان اظل عطشان
واروه اعله شوفك
بطرانه هاي الناس
يردوني اعوفك
==============
أهلا وسهلا بيك
واكثر بشوفك
ولتفكر آنه بيوم
أگدر أعوفك
==============
أهلا وسهلا بيك
واكثر بملگاك
والگعده تحله اهواي
من نگعد اوياك
==============
أهلا وسهلا بيك
واكثر بالوياك
والگلب گبل العين
فز وتلگاك
==============
روحي سفينة شوگـ
وانته هواها
ولو فكرت تنساك
تغرگـ عساها
==============
الگلب تالي الليل
فز فرد فزه
لو للحبيب اتروح
لو نحري احزه
==============
لا تعتقد ناسيك
دوم بخيالي
من دگت النقال
أعرف الغالي
==============
أعذرني نص الليل
لتضن زعجتك
تعرف بأني أهواك
وتعرف معزتك
==============
بالدمع غرگانات
ظلن يالعيون
الفارگـ الخلان
يتبسم اشلون
==============
هنيالك انته اتنام
ليلك بلا هموم
صدگني من فرگاك
من نومي محروم
==============
شوف شكثر ولهان
وتعبان بالي
بس إلك روحي اتهيد
والله يغالي
==============
هاك الگلب يفلان
أخذه برسالة
گعدني نص الليل
يشكيلي حاله
==============
لو تدري بيه شصار
من غبت عني
مثل اليهيم بليل
وبراسه جني
==============
إحنه بجسد روحين
والدم فرد دم
والگلب واحد صار
بالفرح والهم
==============
مرهم دواها الروح
وانته الها مرهم
ماأرهم بلياك
گلي انته ترهم
==============
نار الدمع بجفاك
عالوجنه طايح
من عندي راح الشوف
من گتلي رايح
==============
إسمك طبع بالعين
كل لحضة اشوفه
وحبك سلك بالروح
مو هينه اعوفه
==============
علمت روحي اعليك
وتريد اعوفك
مجدي أدگـ الباب
بس كون اشوفك
==============
نبته وغصن مكسور
وبشحت الماي
هذا آنه حالي اعليك
من تگطع اوياي
==============
يسألني ملك الموت
روحك شجاها
گتله حبيب الروح
گبلك خذاها
==============
موبيدي هاي الروح
سلمت أمرها
حاير شسوي اشلون
والحب دمرها
==============
عين الك روحي اصير
والدمعة دمي
وريت الهموم البيك
تنقلها يمي
==============
من علو سبع جبال
روحي أذبها
واكتب على التابوت
حبكم سببها
==============
صدگني ما ناسيك
وبدمي تجري
شنهي المعزة البيك
بس الله يدري
==============
صدگـ إلك حنيت
واليحن بلوه
مابيه حيل أنساك
چاهيه گوه
==============
من أرسل الكلمات
ماتشفى الجروح
كون من ادوس ارسال
أرسلك الروح
==============
گالولي روح بعيد
وانسه التريده
گلت البعد شيفيد
مو گلبي بيده
==============
ريت الگلب بستان
وانته الورد بيه
لو نشف منه الماي
بدموعي اسگيه
==============
ريت الگلب نقال
منك فلا جوز
الدم رصيد ايصير
بس الك محجوز
==============
هاك الگلب والعين
تبقالي بس عين
لو هم بعد تحتاج
أگسمها نصين
==============
شگد انته عني بعيد
بس روحي تهواك
أدفنها عدله الروح
لو مرة تنساك
==============
الخوه بس وياك
تنحسب خوه
من راسك لرجليك
تنگط مروه
==============
بالحلم چنك جيت
من ذاك الغياب
گبل ايدي شفت الروح
فتحتلك الباب
==============
هجرك سهم چتال
بالهم رمانه
وشوف آنه من فرگاك
ماچني آنه
==============
هم حلو هم سبورت
فوگاها كشخة
حگه الگمر لو راد
لصورتك نسخة
==============
تدري شعمل فرگاك
من رحت عني
جثه على التربان
محد دفني
==============
صاير مترسل ليش
ميهمك امري
هنه خمس سنتات
چنك متدري
==============
روحي امنهد فرگاك
ماتقبل تنام
أذكرها نامت يوم
قبل أول العام
==============
للدوم اسولف بيك
يارفعة الراس
الدنيه كلها بخير
لو مثلك الناس
==============

شگ عيني واشرب ماي
واترس چفوفك
بس وحده خلها ارجوك
بيها ارد اشوفك
==============
بالعتبة شفت دموع
من طول جفاك
ثاريها حته الباب
تبچي اعله فرگاك
==============
نقلت الى قسم الشعر الشعبي حفاظا على نظم سير المنتديات

[ابو ياسر الكعبي]

مجموعة كبيره
من اجمل الدارميات
سلمت يداك نجمة البصره
رمضان كريم
تقبلي مروري

[محـب الحسين]

مجهود واضح
شكرا جزيلا اختي العزيزه
دمتِ ودام عطاؤكِ

[ابن الشاعر]

جهود مبذوله في جمع هذه الدارميات
بارك الله فيك يابنت البصره الطيبه
يا نجمة البصره لك لك التقدير والاحترام
اخوك ابن الشاعر

[نجمة البصره]

اشكركم على ردكم الرائع احبتي منورين اخواني العزاء

ورمضان مبارك عليكم

[ابو حيدر الزبيدي]

جزاك الله خير في الدنيا والاخرة
وجعلـه في ميزان حسناتـكـ

تقبل مروري بود

[نجمة البصره]

مشكور على ردك ابو حيدر

[عاشق وحنون]

كلمات في قمة الروعه

[نجمة البصره]

منوره حبيبتي