تويت
وداع رسول الله لخديجه
سنـد چانت لبـو الـزهره خديجه الطاهره الکُبـره
غـابت وسفـه عـن داره عليهـا ادموعه تـتجـاره
***
مـن دار النبي المُختار صرخة حِزن نسمعهـا
مـرتفعه إعـله بـرج الهم ماتـنشف مدامعهـا
عله نعش الرزيَّـه اتحوم گلب الهادي منبعهـا
رسول الله ابنشـيح الآه والدمعـه يـوَّدعـهـا
ينـادي ارحمها يـاربـي هـاي السَّـهلت دربـي
فضلهـا واضـح آثـاره عليهـا ادموعه تـتجـاره
***
چـانت سند للهادي إبنفسها ابمالها ابـدمهـا
حرَّه وجاهـدت لله نصـر للـدين کـل همهـا
علـه الأسلام مـا تنعد ولا تحـصه مکارمـهـا
بـأسرار الوحي جبـريل أبـو القاسم يعلَّمهـا
صارت للـرساله أسـوار شالت دعوة المُـختار
گلبهـا خيمـة أسـراره عليهـا ادموعه تـتجـاره
***
عـن دار الوحي غابت عمرها أرتحل بشموعـه
چم گلب العليها يلوب وچم روح اللَّي مفجوعـه
أمسه المُصطفه بلوعات لوعه تسابگ بلوعـه
حزين وخاطره مکسور کل همومه مجموعـه
الخديجه الساکنه بروحـه غدت تتلاچم اجروحـه
إسعِـرت ماتـنطفي نـاره عليهـا ادموعه تـتجـاره
***
سمَّـاه النبـي المُـختـار هـاذه العـام عـام الـهـم
علـه الهادي شعظـم همـه أصبـح للهظـم مـنجـم
روحه إتنازع الحسرات وجفنه إعله الدمع سلهـم
خضَّـر للمنيَّه أجـروح ليـل الفاجعـه او دلهـم
جفنـه لا غُمض لا نـام وخديجـه النصرت الأسـلام
نعشهـا الليلـه خـطَّـاره عليهـا ادموعه تـتجـاره
***
غسلَّهـا النبي الهادي ابروج المدمع المسفـوح
کفَّنها أبجـرح گلبـه وحنَّـطها ابنشـيج الـروح
وأملاک السمه نزلت ونـزل يمَّ الجنازه الـروح
يـواسون النبي العدنان بـالهم والحزن والنـوح
نـعشها إستقبل القِـبلـه عليها المُـصطفه صلَّـه
فـاض النـور بـاکتـاره عليهـا ادموعه تـتجـاره
***
حُمل نعش الکرم والجود چف المُصطفه طاهـا
بيـده حُـفـر مـدفنـها وحـدر التُرب وآراهـا
اُم الـزهـره ودَّعـهـا وخـلَّـه الـروح ويَّـاهـا
والـزهره إعله اُمـها تنوح مـا بطَّلت مبچـاهـا
تنادي إعله اُمهـا مهمومـه بحزن دمعـتها مرسومـه
الهـادي أبـروح مـحتـاره عليهـا ادموعه تتـجـاره
***
ابوياسر الکعبي
تعليق