قصيده منبريه للسبايا للشاعر الحسيني عماد الدريعي

[عماد الدريعي]

يشايل راس حامينه ولينه مر ابراس اخونه اعللضعينه
الگلب ما يحمل افراگ عليه من هسه مشتاگ
أشحال ابأمنه لو تسمع ونينه
يشايل راس حامينه ولينه
*********************
يشايل راس اخونه تعـــرف امنين هذا الراس يرجع والنســــاوين
وليش امگيدينه وجسمه ضل وين والمن ماخذه وين احنه ماشين
ولك خاف امنلحساب هذا امنهل الأطياب
رسول الله يسميه السفينه
يشايل راس حامينه ولينه
**********
يباري اعللضعن راسك يمهيوب وجسمك علوجه يحسين مگلوب
خنصر منه گطعو سلــبو الثوب يا بيرغ حزن شيصبر الأگلوب
عليك امعوده العين صاحن هلنساوين
ياهو الي يردنه للمدينه
يشايل راس حامينه ولينه
**********
يرتل الآيه راسك خـويه ترتيل يضوي الدرب النه ابوحشت الليل
يل راسك سمه وعيونهه اتسيل ياهو اليگــدر ابراس السمه ايعيل
يزيد ابعصته اعليك يضربك وآنه اصد ليك
اليعيل اعللسمه اجگد صلفه عينه
يشايل راس حامينه ولينه
يشايل راس اخونه الگلب مالوم خل الراس يمنه اسـويعه بليوم
نشكيله الجره واسوت الـــــگوم بلكت يفزع النه حسين ويگوم
أخوي وأدري عطشان عليه الگلب لهفان
أسگيه من دمع عيني الحزينه
يشايل راس حامينه ولينه
***********
يا بيرغ فخــــرنه وبلسمه ايلوح بعدك گلــــي شيطيبهه الأجـــروح
أذا ناوي الرحيل أشلون ما نوح أخذهه اوياك روحي الوين متروح
أخوي وروحي وياه واضل للموت أنعاه
خيمه وجان اخونه ايفيي لينه

خادم الحسين
الشاعر عماد الدريعي


يشايل راس حامينه ولينه

[محب الرسول]

شكرا احي العزيز على القصيده الرائعهبارك ا الله بك وجعلك الله من انصار الحسين في الدنيا والاخره

[عبدالله الشاعر]

تسلم اناملك على ماخطت ياواسطي تحياتي
اخوك الصغير
(عبدالله الشاعر)
واسط ــــ الحي
مقيم في بغداد