******************
رسالةإلى كل زوجين محبين لبعضهماالبعض وكان كلامنهم يسابق الآخرفي التضحيه والصفح لعله يحظى برضاالآخر، رسالةلكل زوجين دبت المشاكل في حياتهماالزوجيه فأوشكت على الهلاك لعلهم يتداركون مابقي لهما منهابسفينة النجاة، ولكل اثنين أقبلا على الزواج كي تعطيهم دفعة قوية للمضي قدما في مشوارالحب الصادق مهما إعترته بعض المشاكل وليعرفوا أن بذور الحب مهماطال وقت نباتها في النهاية تثمر وتبقى حلاوتهاعالقة في الأذهان على مر الزمان.
في آواخرالشهرالتاسع وآواخر اختبارات رابع جامعه الألآم اجتمعت والنتيجه قربت من كلا الطرفين لايخففها إلاممازحة أبومصعب (أقول موتختبرين وتنسين بطنك في القاعه ترانامشتاقين)
مرت الأيام وانتهت الإختبارات وطلعت النتيجة زينه وكان التخرج وبعدها تمت الولاده طفل أحلى من القمر (مثنى)انضم لاخويه(مصعب ومعاذ) أبومصعب الأرض موشايلته من الفرح ولد ثالث وحرمته خلصت دراستها وبتتفضى لعياله وألحين يقدرون ينقلون لبيتهم الجديد على راحتهم ،:أم مصعب وش رايك بعد الأربعين ناخذ لناإسبوعين في الشرقيه ،ماتقصر(الله لايخليني منك )بس ودي ننقل قبل الدراسه للبيت الجديد تعرف بياخذ له وقت أزود من الشهرين ،وش دراسته بعد !ماخلصنا ؟ ولاودك تتوظفين بعد وينعاد الموال ويمكن في أهليه بعد !!،لاالله يهداك أقصد دراسة مصعب ولاناسي إنه بيدخل أولى وماأبيه يتنقل من مدرسه لمدرسه.
*********************
الحلقةالثانيه/ أثناء الترتيبات للبيت الجديد أحس أبومصعب بتعب خفيف وظنه إرهاق من الشغل المتواصل في الدوام والبيت الجديد،حلقه بدأيعوره ولايقدر يبلع الأكل ظنه زكام ولوز وبدأ يراجع المستوصفات من مستوصف لمستوصف وكلايدلي بدلوه إلي يقول جيوب أنفيه تبي كي وإلي يقول لوز لازم عمليه وكل دكتور يعطيه أدويه غيرشكل ولانفعه منهاإلارحمةالله وأبومصعب ضايع بين هالأطباء وماراح مستشفى كبير مفكرإن تعبه نفس كل مره شوي ويطيب بس حالته من سيئ إلى أسوأ وخلال أقل من شهر ولصعوبةالبلع عنده الي اقتصرت على التمر المخلوط في الخلاط مع الحليب فقد أكثر من عشره كيلو وأم مصعب مهي داريه وش تسوي ودهاتخدمه بعيونها بس مايتعذب قدامها، خصوصاإنهم تعلقوا في بعض أكثربعدماتحسنت علاقتهم الزوجيه أكثر وأكثر في السنوات الأخيره وكل واحد صار يتفانى في رضى الثاني ،وهذاشيئ طبيعي لأي علاقة زوجيه جديده لازم يشوبهابعض المشاكل في بدايتهاإلي يسميهاالبعض (بهارات الحياه) بس الأذكياءإلي مايخلونها تطول معاهم ويسعون لسعادتهم بس وأي صعاب يحاولون يذللونها حتى تمشي حياتهم على أحسن حال.
*****
الحلقةالثالثة/
لماأحس أبومصعب بصعوبة الوضع قرر يروح مستشفى كبيرووكل أمره لربه ، وفي عيادة الأنف والأذن والحنجره في مستشفى الملك فيصل التخصصي البروفوسور يدخل منظاره في حنجرة أبومصعب التي يؤلمهادخول اليسير من الأكل فكيف بهاأن تتحمل أذى هذه الألات فإلى الله المشتكى، أدخل المنظار في حنجرة المريض وأخذ يسجل مايرى وأثناء دخول المنظار وعند انتصافه في حلق المريض إصطدم بشيئ أعاق مجرى سيره فأوقفه الطبيب وأخبر مريضه عن ضرورة أخذ خزعة لذلك الشيئ ومعرفة محتواه ،أخذت الخزعة وكانت النتيجة بعد عشرةأيام ، لاتسألواعن حا ل أبو مصعب وزوجته في تلك الأيام النفسيه متدهوره وكل واحد في نفسه يقول بأسى يارب لاتحرمني منه، أبومصعب أخذ مفتاح سيارته بيروح للنتيجه أم مصعب بحنان:لازم أكون معاك وقت النتيجه أبومصعب وقلبه منقبض:مقدرإلي تقولين بس معاي ولامنتي معاي النتيجه وحده ماراح نشوف إلا إلي الله كاتبه خليك مع الأولاد وقبل هذاوذاك الله معاي(ونعم بالله)في المستشفى أخبر بالنتيجه المره أخبره الدكتور أن المؤمن مبتلى وعليه أن يصبر ويحتسب ثم أخبره بالنتيجه وهي(سرطان في الغده اللمفاويه)كان حاس بالنتيجه من الألم إلي يعانيه تصبر وإسترجع ووكل أمره لله ومافكر في نفسه في هاللحظه قعد يفكر في عياله وأم مصعب كيف يوصل لهاالخبر وهوالمفجوع في نفسه قبلها قعد يدور بالسياره حوالي الساعه يصبر نفسه ويفكر كيف يوصل الخبر لأم عياله الخبر الي ماقدر يستوعبه ولكنه مؤمن بالقضاء والقدر ماقطع تفكيره إلاصوت الجوال ولماطالع اسم المتصل إلاهي أم مصعب عندهاماقدر يمسك نفسه قعد يبكي بصوت مسموع يارب وش أقول لهاأقول أحتمال هذاآخر يوم لي معاكم ،ولاماوصيك على نفسك وعيالك، ولاغلاتكم وحبكم هوالي ماخلاني أرد عليكم وأطعنكم بالنتيجه، الجوال ماوقف يرن والمسجات ورى بعض من أم مصعب تبين مدى قلقها على أبوعيالها أبومصعب عرف إنه لومايردألحين أم مصعب بتفقدأعصابها رد عليها إلاصوتهاالملهوف لمعرفة النتيجه: بشر أبو مصعب وش النتيجه؟،مسك نفسه من الصياح راحم رفيقةعمره من معرفة النتيجه،خيرإن شاءالله لماأجي البيت أقول لك !لماتجي البيت !!!ليش ماتقول ألحين أكيد النتيجه موطيبه؟ لازم تقول ألحين ، بعدين ولاألحين ماعاد تفرق وأخذت تصارخ بهستيريه وش النتيجه الله يخليييييك قول ألحين 'كلمة (الله يخليك) هدمت تماسك أبومصعب وقعد يبكي هوالثاني وركن السياره وسط الشارع وقال لهاوش أقول لك ياأم مصعب أقول إني أيام وأموت وأخذ يبكي وصوته يتقطع حصلواس _سرطان في الغده اللمفاويه
أول يوم لك في المستشفى وماني قادره أتخيل وضعي بعد كذا مهي سنه ولاسنتين إلي قعدناهامع بعض هذي ثمان سنين من أروع مايكون مرت ،كلماتلفت في شقتناالصغيره أتذكر أشياء قد تبدو تافهه للبعض بس بالنسبه لي جدامهمه لانهامنك، قطع تفكيري صياح مثنى إلي ماكمل شهرين ولماأخذت أسكته تجددت جراحي يارب أعلم أنك أرحم به مني بس بيجي اليوم الي ينطق فيه(بابا)ويردعليه أبوه؟بس صدق من قال أن إحنايالحريم دايم نفكر بأشياء مالهاداعي ومهوب وقتها ؟،أخذت مسواكي وقعدت أتسوك فيه أيضاتجددت الجراح لماتذكرت إنه لمايشوفني أتسوك يقول هذاالبيت نسيت من قال إنه له الظاهر لعبدالله الجعيثن/ أغار عليهامن أمهاوأبيهاومن غضبةالمسواك إذ دارت بالفم رميت المسواك وشلت مثنى الي نام وحطيته بسريره الي في غرفتنا تخيلت شكل الغرفه ،البيت الحي ،الكون ،بدونه (الله لايقوله) ونمت ذيك الليله أول مره بحياتي بدونه وبدون مصعب ومعاذ الي وديتهم عندأمي وكانت ليله موحشه، أخذت ذيك الليله أكلم نفسي وأقول نذر علي لي طلعت بالسلامه لأخليك تسهر على راحتك ولاأحاسبك أخليك تعصب على راحتك ولاأناقشك لين تهدأ بس تطلع بالسلامه، في اليوم الثاني رحت لزيارته ولكم أن تتخيلواشكل الرجل وهو في سريرالمرض شلون مؤلم والأكثرإيلام إنه في حالة ضعف ومرض خبيث جلست عنده وبيطلع من بكره وبعدهاياخذ كيماوي وبدت تعليمات الدكتور أبعدواالعطورات وروائح المنظفات وإزعاج الأطفال و.و.و بدأو بتزويدنابالكتيبات ومهدولناشكله بعد الكيماوي وتساقط الشعر وغيرهامن آثار الكيماوي أعاذناالله وأياكم وكل غال وحبيب عليناوعليكم منها وبدأت الإستعدادات لتهيئةأبومصعب للعلاج وأخذنانجامل أمامه وهويجامل أمامنابتقبل الأمر وكل مناكل ما أحس بغفلة الثاني عنه أخرج مكنون صدره وعينيه من الألم والحسره ،...وتمضي الأيام والمرض يثقل في وطأته على أبومصعب.
الحلقةالخامسة/٠٠
٠ خمسةأشهر مضت على أبومصعب يدخل أسبوع ويطلع ثلاثه الرجال نحف وطاح شعره وصار لونه أقرب إلى السواد الأكل مايدخل في حلقه أبد ولاالمويه بس يعطيه المستشفى حليب طبي يعوضه عن أي فيتامين ناقصه يسمى(أنشور)إزدادت الحاله سوء وبدأوبالإشعاعي وهوأسوأمن الكيماوي صح هوليزريوجه بس آثاره نفس آثارالحرق بعدهامن حيث الجلد إلي يتقطع والصديد إلي يطلع ،إزدادت الحاله سوء قررواإرساله للخارج(بريطانيا)لعمل قصدره في الصدر لسهولة إدخال الأدويه بدل الإبر الدائمه وعمل فتحه في المعده للأكل عن طريق إنبوب يدخل فيه بديل للأكل سائل.بدأت الترتيبات للسفر أم مصعب ودهاتسافر معه بس طلبهاأبومصعب تجلس مع العيال خصوصا إنه مثنى ماله إلاسبع شهور ، ومصعب له ثلاثه شهور باديه مدرسته وكلهاشهر ويرجع بالسلامه بإذن الله على حد قولهم.
********************
الحلقةالسادسه/
سافرأبومصعب بريطانياوراح معاه أخوه وأم مصعب تنتظر رجعتهم على أحرمن الجمرجلست عندأهلهاو نقلت مدرسة مصعب(وهذاإلي ماكانت تبيه من البدايه) قريب من أهلها حتى لورجع أبومصعب بتخليه عندأهلها يهتمون فيه لأنه أولى ولازم تأسيس وهي بتعطي جل إهتمامها لأبومصعب لمايرجع بالسلامه،مرت الأيام وأم مصعب ماهي مع الناس عيالهاأهملتهم وكلتهم للخادمه ووالدتها ماقصرت بعد تداريهم مقدره حالة بنتها إلي هي فيه،أم مصعب صارت تنام النهار وتسهر الليل حتى تتهرب من نظرات الشفقه إلي يوجههالهاالناس ،شهر مضى وأبومصعب لين ألحين ماخلص عملياته ومراجعاته يعني معناته بيطول أكثروالله يطولك ياروح ،منع أبومصعب من المكالمات الهاتفيه وصار إتصاله مع أبومصعب عن طريق الماسنجر ،تسهر الليل وتنام النهار ولاهي حاسه بالعالم حواليها لقبت نفسهافي الماسنجر ب(الغريبه بغربته)وهذااللقب ضايق أبو مصعب كثير وقال لهاأدري إنك تغليني بس عشان تبينين لي أكثرأبيك تغيرين هاللقب صح أناغريب في الديار واللهجه والدين ومالي هناإلاالله ثم أخوي أبومحمد بس أنت في ديرتك وبين أهلك لاتتعبيني زياده في مجردالتفكير فيكم إنكم مومرتاحين!ردت عليه :أنتم شهرين إن شاء الله وترجعون وعشانك بس بحطه إن شاءالله(المتألقه بعودته)أخذت تصطنع الأبتسامه في كل مره تقابل فيهاناس يعرفون سالفة رجلها وهي عكس مايتصورون ،قعدت تكلم نفسها:أبومصعب أنت صادق لماتقول إنت بين أهلك موغريبه صح !بس جسدا لاروحا كيف أكون عايشه مع الناس والأوكسجين إلي أناعايشه عن طريقه إلي هوأنت موموجود ،لماأشوف الناس يضحكون يلبسون جديد يتزاورون أتسآل في نفسي هل يحسون بطعم إلي يسوون إذاأناالأكل إلي هو الأكل ماأحس بطعمه وش عاد اللبس والروحه والجيه عيالي إلي هم عيالي ماكني أعرفهم بس همي متى أكلمك همي إن دق تلفون في البيت بس قعدت أتسمع وحسب نبرة صوت إلي يرد كنت أعرف وش السالفه إذاتغيرت نبرات صوت إلي يرد من عالي لمنخفض قلت بس صار لأبومصعب (شي لاسمح الله) بعد ذاكله بتقول عني غريبه ولالا؟إسمح لي ماراح أغير اللقب حتى ترجع بالسلامه (بإذن الله).
***** الحلقةالسابعه/
استمرت مدة عمليات أبو مصعب هناك خمس شهور وحالة أم مصعب النفسيه صعبه كل يوم تقول بيجي بكره لابكره المهم السرطان مازال ينتشر في جسم أبومصعب تحت الأبطين وأسفل البطن وأعلى الفخذين وهوصابر ولله الحمد والمنه وجو بريطانياماناسبه في العلاج وقرروانقله لأمريكا لأن جوها أدفا وهم بيسوون له عدةعمليات ومومستعدين يغامرون بعدفي بريطانيا بس قبل كذالازم يرجع السعوديه أول عشان يخلص تأشيرته من سفارةأمريكافي السعوديه،وهذاأسعد خبرسمعته أم مصعب لأنهاأولابتشوفه وثانيابتسافر معاه ولاراح تتنازل عن السفره حتى لوكان الثمن تخليهاعن عيالهامثنى ماشاء الله صار عمره سنه ومعاذ أربع ومصعب ست سنوات ويدرس خلاص وعشان تروح معاه وتهتم فيه وقبل هذاوذاك تقر عينهافي شوفته كل شوي لازم تخليهم إلامعاذ بتاخذه معاها مظطره لأنه توه مسوي عملية عيون ولازم له رعاية خاصه من أمه الحنون.
موعد رحلة أبومصعب الليله الساعه ثمان ،أخذت أتخيل شكل أبومصعب خمس شهور ماشفنابعض والعمليات أكيد أثرت فيه كثير رحت لبيتي أستعد لإستقباله المطار ماقدرت أستقبله فيه لأن كثير من أهله الرجال وأصدقائه راحو يستقبلونه والسبب الحقيقي إني ماكنت متأكده من عواطفي في ذاك الوقت لوشفت التغير إلي صار فيه وش بيصير فيني، بيتناأمتلى من أهلي وأهله المستقبلين له ،في لحظة استقباله كنت متمنيه عدم وجود أي أحد إلاأناموأنانية مني بس تعرفون المشاعر كيف تصيرفي ذاك الوقت!وصلت الرحله بالسلامه الجميع استقبلهم استقبال حار طبعاأول الرجال بعدين الحريم سمعت صوته وهويدخل يبي يسلم على محارمه في آخر لحظه قمت ورحت لغرفتي هوأكيد بيسلم على أهله ويجيني على طول لأني مثل ماقلت ماني متأكده من عواطفي قدامه وقدام الناس،إنفتح باب غرفتي وعرفت إنه هو أصابتني حالة ضعف هوان لماشفته سلمت عليه ثم أجهشت بالبكاء أجتمعت علي الشوق له والرحمةعليه شكله مره تغير أنحف من أول وراسه مافيه شعر وعيونه بارزه مثنى لماشافه قعد يصيح مايعرفه وشكله الله المستعان ،مضت تلك الليله كسابقاتها ولكن أكثر تأكيدا لحال أبومصعب الذي يزداد سوء يومابعد يوم،بدأ مشواري مع أبومصعب والعنايه لازم تكثف بعد القصدره الي في صدره لأننا ندخل الدواء إلي كان عباره عن أدويه فيها وفتحةالمعده الي نقيس مقدار الأكل بعدين ندخله فيها وكل شيئ يحتاج تعقيم وحرص،أبو مصعب تغير ،دايم سرحان ومعصب وكان هذافوق طاقتي،عيالي عند أمي حتى مايزعجونه ومايخربون الآلات الطبيه، النفسيه قليله فيهاكلمة سيئه كان كل شيئ أسويه موعاجبه ،صوته مبحوح ماأفهم وش الي ينرفزه يتكلم شوي وماأفهم وش يقول وإذاقلت مافهمت يتنرفز ويتغطى باللحاف يعني مابي خدمتك شكرا ومايتكلم بعدها،طيب ليييه؟والله ماني فاهمه وش تقول صبرك علي حرمت نفسي الأكل عشان ماتشتهي شيئ وأناآكله صح تغصب علي (روحي كلي) وأجاملك وأقول خلاص أكلت ،بس كيف يهناني وأناأتذكر لماتقول تدرين وش أتمنى غير الجنه والشفاء تدرين أتمنى أشرب مويه !هذي النعمه العظيمه إلي مايعرف مقدارهاإلاإلي فقدهالأنه سبعةشهور ما يدخل فمه شيءحتى المويه بس من فتحة المعده عشان كذاتمناه لأنه مايحس بطعمه،قلت له قل آمين (الله يسقيك من ماء الكوثر)وأنتم أمنوابعد مايحرمني ولايحرمه ولايحرمكم موية الكوثر، حاولت بقدرالمستطاع أرضيه بس ماألومه لأن أي أحد يصعب عليه إنه كان يخدم نفسه وألحين الناس يخدمونه بس أناموأي أحد أناأم مصعب حبيبتك أناأم مصعب إلي مايرضيهازعلك وإن جيت بتنام زعلان راضتك وقعدت تمازحك وتقول ترى موب عشانك بس عشان الملائكه ماتلعني ،أم مصعب إلي الناس عايشين وهي مومعاهم تمني نفسهابشوفتك ولماجيت تغير كل شيئ ،كأنك موأبومصعب الي أعرفه، مع تغير شكلك الجذري كان يجيني وقت أقول يمكن مو أبومصعب (لاتستغربون)العلاقه صارت بارده أحاول أسولف معاه أغيرالجو شوي بس هو نفس ماهو يناظر بعيد ومايتكلم ساكت أبيه يهز راسه على الأقل مافيه!الأوراق مازالت يخلصونهامن السفاره أوراقه وأوراق أخوه وأوراقي أنا ومعاذ وأخته إلي بياخذون منهاالنخاع لزراعته في أبومصعب حتى تتجدد الخلاياوتقدر تدافع عن الجسم من الأمراض ولأنهاالوحيده إلي طابقت مع أخوها.
الحلقةالتاسعه/
مابقي من الشهرإلاالقليل أحاول ألطف الجو جيته مره إلاهو يبتسم وقال بصوت مبحوح تعالي بقولك حلم حلو حلمته رديت من الفرحه عساه خير وشهو قال :حلمت إني في بستان كبير وأتمشى فيه وآكل من ثماره هوتفسيره إنه بيشفى ويقدر ينطلق في المشي دون هالآلات التي تقيده وبيقدر يمشي بعد هذاتفسيره بس أناماإرتحت وكان تفسيري ثاني أخذت أصيح قال فرحانه قلت أكيد وكنت عكس هذا كان تفسيري إنه خلاص ماراح نشوفه وهذي الجنه ،اللهم ليس لنامطلب في هذه الدنياسوى الجنه فلاتحرمناإياها(آمين)الكل يفرح بالجنه بس الفراق صعب طردت هالوساوس واستغليت فرصة تلطيف الجو وقعدت أسولف معاه بس قلبي منقبض صعب وصف الإحساس بس عساه يوصلكم شوي منه!وهو بعدالحلم تغيرت نفسيته شوي للأحسن،اشتعلت الحرب بين أمريكاوالعراق وإسحبت أمريكاكل رعاياهامن السعوديه وبدت تسكر سفارتها وتقفل شغلهالين تهداالأوضاع شوي ، رفضواطلب التأشيرات في ذاك الوقت حتى تهدأ الأوضاع بس وافقواعلى المريض(لصعوبة حالته) ومرافق واحد إلي هوأخوه حتى أخته إلي بياخذون منهاالنخاع أجلوها معاناوهذاإلي طمني وخلاني أرتاح شوي لأنه بقى أحد أضمن روحتي معاه ، تحددالسفر وبدأت التجهيزات له وأناكأن قطعه من قلبي بتسافر معاه جهزت أشياءه وتكدرت لماتذكرت الحلم مجردالتفكير في أنه ماراح يرجع صعب والأصعب إني ماراح أروح معاه ،جايوم السفر قال لي :لقب الماسنجر وعدتيني تغيرينه بس ماتغير! قلت صدقني لمايجي الوقت المناسب والله أغيره ،حاولت أقول حللني وأنت بحل بس الكلمه عيت تطلع كيف وأناكأني أتفاول عليه وهو لين ألحين حي،ودعته وودعت قلبي معه ماقدرت أقول إلااستودعتك الله الذي لاتضيع ودائعه والحمدلله إنهاطلعت تلاقت العيون وكل وحده فيهاألف كلمه وكلمه بتقولهابس آثرت السكوت وترجمت الكلمات بشلالات الدموع إلي إنهمرت ،(سافر الله يسترعليه) وأناعلى أمل الأوضاع تزين بين العراق وأمريكا عشان تفتح السفاره وتخلص أوراقي بتقولون هاذاإلي هامك بس ؟أقول عشان تصدقون لماأقول لكم إني ماني عايشه مع الناس!الأوضاع في العراق كل مالهاتزداد سوء وبدت أمريكابضرباتهاالمتتاليه على العراق ولافيه طاري هدنه أخيرا إستولت أمريكاعلى العراق(بالأصح) وهدأت الأوضاع وكان هذابعد أربع شهور من سفر أبومصعب!انتهت أوراقنا في السفارة وتم السفر لأمريكا وأناأمني نفسي بلقاء حار مع أبومصعب بعد غربة أربع أشهر لن أتحدث عن حالتي في ذلك الوقت لأنه تكرار لحالتي عندسفره لبريطانيابل أسوأأيضا،سافرنا وكانت طائرتنامتوجهة إلى تكساس وبالتحديد(هيوستن)نمناتلك الليله لأن أوقات الزياره انتهت وغدانزوره بإذن الله.
الحلقةالعاشره/ ٠ ٠
جوالمستشفى (الموثوديست )كان بارد جدامع إن الدنيا كانت صيف ،سمحوالنابالزياره وكان رقم السرير(٢٢) تناوبنافي زيارته لأنه كان مسموح بدخول أثنين بس دخل أخوه وأخته وبعدين أناومعاذ، طلعت أخته تمسك معاذ إلي صار عمره أربع سنين ونصف وأناأدخل وبعدين يطلع أخوه ومعاذ يدخل،أول شي القسم إلي هوفيه كان العنايه المركزه والشديده عرفت كذامن الملابس والكمامات إلي لبسوناخوفاعلينامن العدوى وهذاالشيئ محد قال لي عليه قالوابس في المستشفى يعطونه جرعات كيماوي ومنعوه من التلفون والماسنجر صدقت آثاري السالفه غير ،دخلت وقعدت أمشي ببطء وأدور رقم السرير كل المرضى في حالات غيبوبه تامه بس آلات تنفس تشتغل وكل مريض يراقبه ممرض أوممرضه عن طريق الكمبيوتر مهدت لنفسي وقلت يمكن تحصلينه نفسهم ليش لا وهم قالوالي طيب والطيب حصلته في العنايه وصلت لرقم السرير صح حصلت أبومحمد(أخوه) بس واقف جنب مريض ماأعرفه له شعرراس ولحيه وهزيل مره عيونه ذبلانه وطالعه من مكانهاوالله يناظر فيني ويأشر لي ويبتسم بعد إي والله هوأبومصعب ماعرفته من الآلات إلي في خشمه وجهاز التنفس الي مفتوح بحلقه و _ماقطع تفكيري إلاصوت أبومحمد ماودك تسلمين قعدت أركض وأرتميت عليه أبكي بصوت مسموع نسيت إن أخوه موجود حبيت راسه قبضت إيدينه شلون ماأبي أسلم وهذي اللحظه أنتظرهامن زمان أناظر فيه بس يبكي أخوه يبكي الممرضه تبكي حمدت الله على شوفته وهان علي منظره بعد ماتخيلته في غيبوبه نفس الباقين طلع أخوه وخلانامع بعض شوي،أناظر فيه من فوق لين تحت كل جسمه بدون مبالغه موصل بآلات حتى رجوله موصله كل هذي الآلات بالكمبيوتر عشان يضمنون إن كل شي تمام لأنه من أول ماسافر لهم سوو له عمليه لفصل المريئ عن القصبه الهوائيه إلي كلهاصارت ثقوب من الإشعاعي إلي سيحهاعلى بعض وعشان كذاماقدر يدخل شيئ لحلقه لأنه إذادخل المريئ وهوكله ثقوب دخل الأكل والمويه القصبه ومن ثم الرئتين، وهذي العمليه مانجحت فصعب عنده التنفس فحطوله فتحة تنفس اصطناعي في القصبه إحنامسلمين ونحمد الله ومالناإلاالصبر ،معاذ تأخر مادخل لأنهم منعوه من الزياره وهولصغرسنه ماعنده مناعه حاولنافيهم دخلوه وقالوادقيقه وهم دقيقتهم مضبوطه مو مثل دقيقتنا !دخل معاذ أبوه بس أشرله لأنه عاجز عن الحركه قلت له حبيبي بوس بابا لأنهم بيطلعونك بسرعه ،تخيلواوين باسه فيه بسرعه قال ماما مافيه مكان وباس إبهام قدم أبوه الجزء الوحيد الي مافيه آلات أوأسلاك!طلعوه بسرعه أبوه قاعد يشاهق مسحنا دموعه (وقعدت ماسكه يدينه وهذاالشيئ الوحيد إلي مسموح نسويه) حتى انتهت الزياره،انتهت الزياره ووعدناه إناماراح نتأخر الزياره الثانيه أشر لممرضته وطلعت ورقه وعطتني ياها مكتوب عليها بخط رديئ جدا(إقريهالحالك )حطيتهافي شنطتي وفي راسي ألف سؤال وسؤال عن محتوى الورقه
رحت الزياره الثانيه ولماخلونا لحالنا سألني عن الورقه موكلام طبعالأن فمه وخشمه كلها ليات كتب لي في ورقه الي صارت الكتابه هي وسيلة التخاطب بينا بالخط المهزوز المهم كتب لي قريتي الورقه قلت إيه وشكرا على الكلام الي كتبته وقفت شوي ماأقدر أقول حللني وأنت بحل عندهاضغط على يدي بقوه يعني كملي ماقدرت أكمل هزيت راسي وأناأبكي يعني ماأقدر أكمل هو فهمهاشي ثاني فهمهاماأقدر أحللك !دخل أخوه وكل واحد غرقان في دموعه طلعني وجلس عنده،تكررت الزيارات وبس يشتكي من سوء المعامله في المستشفى وكلهاكتابه طبعا جمله أثرت فيني كثيروهي بعد شكواه من سوء المعامله يقول: (وخصوصالمادرو إني سعودي )وهذايبين عدائهم للعرب لاتقولون ليش ماقدمتم شكوى إحناكنانبي سلامته والسلام ومازلت أحتفظ بكل كتاباته ذات الخط المهزوز،في كل مره أشوف في عيونه نظرات يالله قولي بس ماقدرت إستمريناعلى هالحال إسبوعين في كل مره أرجع من الزياره تسألني وحده تعرفت عليهاهناك إسمها (مشاعل )وهي مطوله وتعرف وش يصير وقد مرت عليهاحالات مثل كذاوأكثر،هاه قلتي له إنك محللته وطلبتي منه الحل (هي طبعا ماتعرف شيء عن الورقة)أقول لها ماأقدر تغصني العبره قالت ترى تندمين والله لويصيرله شي( لاسمح الله) عزمت إني أضغط على نفسي وأقول بكره ويصير إلي يصير أهم شي يرتاح هو مع إنه ماجاء منه تقصير، لبست عبايتي طايره من الفرح موعد الزياره قرب وبروح بسرعه أقول له إني محللته أبومحمد جالس في الصاله ماركب السياره وجهه متغير أبومحمد محنارايحين الزياره ؟لا ،ترى مي سهله كلمة لافي ذاك الوقت لأنهاتحمل معنى واحد بس إن أبومصعب موطيب ولاصار له شيئ ،ليه ؟ وأناقلبي ينبض بسرعه ،عدل جلسته وتغيرت نبرة صوته وقال أبومصعب سأت حالته أمس وسووا له عمليه مظطرين في القصبه الهوائيه لتوسعة مجرى التنفس وهوفي غيبوبه تامه وبكره بنطل عليه،يعني في غيبوبه زيهم مايحس بشيئ ؟بس ينتظرشوي أقول له والله محللتك ماأقدر أتخيلك بتصحى وإلامنت صاحي من هالغيبوبه وتسمع لي وينك من زمان يامشاعل مانبهتيني؟الله يسامحك بس موذنبك ذنبي أنا إلي ماحسسته بكذا أبومصعب لوترد علي أقول لك كلام كثير كنت مأجلته لاتخليني غريبه بغربتك في دنياغريبه والله أحبك وماأقوى على فراقك.
الحلقةالثالثةعشر/
رحت للزياره بسرعه توجهت للسرير(٢٢ )ماحصلته فيه طاح قلبي أخذت أسأل كأني مجنونه ٢٢ردو علي إنه إنتقل لغرفه خاصه نظرالحالته الصعبه دلونا على الغرفه لبسوناملابس أكثرمن الأولى وأعقد ،صوت الآلات أكثر إزعاج من الأول الآلات كثيره الغرفه مزدحمه بالأطباء شي واحد تأكد لي إن حالته تزداد سوء ،قربت منه جهاز جديد في حلقه ورقبته مانقدرنميزهامن القطن الطبي التنفس سريع والغرفه جدامخيفه حطيت يدي على راسه وأناأصيح وقعدت أقراعليه وأدعي له من كل قلبي يعافيه ربي من ماهوفيه،اشتقت لك ياسرير(٢٢)على الأقل كان يكتب لناونكلمه ويضحك لناأماألحين في غيبوبه ولافيه أدنى تحسن ،قعدناعلى هالحاله لمدة إسبوعين نروح كل يوم ثلاث مرات زياره نقرأعليه ونجلس عنده لين ينتهي وقت الزياره وهو نفس النايم مايتحرك إلامرتين جداأفرحتني الأولى لماكنانقرأعليه فتح عيونه وقعد يناظر السقف وهويبتسم والثانيه لماكان أخوه يقرأعليه ووصل آية(أمن يجيب المظطر إذادعاه ويكشف السوء)فتح عيونه وقعد يأأشر بالسبابه للسماء وهويبتسم وكلهاوهوفي الغيبوبه،وقعدناكذا حتى قالوالناالأطباء إنهم باقي بيسوون له عمليه أخيره في القصبه الهوائيه عشان يرقعونهالأنهامثقوبه من كل مكان وبياخذون لهاغشاء من القلب يرقعونهافيه وماخيرونا في العمليه لأنهاضروريه بس حبوايعلمونا،سوواالعمليه وماعملواحساب للي فاجأهم لمابدو افي العمليه وأخذواغشاء القلب وفتحواالحلق وبدويغلفون القصبه الهوائيه بالغشاء إنهارت القصبة الهوائيه في إيدينهم تفتتت أزالو جميع أجزاء القصبه من الحلق وأغلقوه كماهو بدون قصبه العمليه فشلت، قدرالله وماشاء فعل الرئتان تضخان الأوكسجين للجسم فقط أماالرأس فلاموصل له لأن القصبه اليتيمه تهالكت ولكم أن تتخيلواشكل الرأس بدون وصول الأوكسجين له ،علم أبومحمد بالخبر قبلي وجاء يخبرني بالحقيقه المره ومثل ماأنازوجته هوأخوه ومصابنا واحد،أم مصعب :ترى سوواالعمليه ،إيه بشر؟ ،مانجحت !بيسوون ثانيه صح؟أم مصعب إحنا مؤمنين بالله ونعرف إن كل شي مكتوب إلي أقدر أقوله إنهم يقولون القلب قدامه ست ساعات يضخ الأكسجين للجسم وبعدهايتوقف،ست ساعات ويتوقف يعني إذاتوقف القلب يموت وهذاالي بيموت إسمه أبومصعب يعني زوجي أبوعيالي ماني قادره أتخيل قطع تفكيري صوت أبومحمد ست ساعات بس خلينانكون معاه في آخرساعاته من الدنيانقراعليه ونتصبرلأن الصبرعندالصدمه الأولى ونتحلل منه ويحللنا كلمة (نتحلل منه) هذي خلتني أأجل التفكيرفي موته وأحقق أمنيتي الأخيره وإنه مايموت إلاوهومرتاح ،ركبناالسياره وتوجهناللزياره ودخلناغرفته مالبسوناملابسهم مااستعجلونافي الخروج من الزياره كل شي تغير عن الزيارات الأولى الآلات مالهاصوت الأسلاك مافي جسمه شي موصل الغرفه فاضيه من الأطباء كل شيئ هادىئ إلاجهاز تخطيط القلب الي يشتغل وجه أبومصعب منفخ وراسه بعد وهذامن تأثير عدم وصول الأوكسجين لهم حلقه مخيط بأكثر من عشرين غرزه وكل شيئ يدل على قرب خروج الروح، قعدنانقرأعليه ونمسح راسه ونبكي بهدؤ تدرون ليش لأن الله في ذاك الوقت يصبر المؤمن وله الحمد والمنه، جسمي ماعاد يشيلني أحس بدواروأحس إني بطيح وهذاإلي مابيه أبي أتصبر طلبت من أبومحمد يوديني الشقه ماقدرت أتحمل أبي أروح أصلي وأدعي له أحسن من الطيحه في المستشفى وكانت هذي مهي فكرتي أنابس حتى أبومحمد وأخته ودهم يروحون ويرجعون بعد ساعه لأننالناأربع ساعات على هالحاله ،رحناالشقه وصلينا _أبومحمد قال روحتكم مالهاداعي بعد إذاصار شي بلغتكم وراح للمشتشفى وقعدأربع ساعات ثانيه وندق عليه مايرد حسينابعدهابالي صار بس مع ذلك ودناأحد يقولها بالصريح قعدنابعدهاأربع ساعات أخرى آخرشي نفذ صبرنا قلت لازم نكلم واحد من إلي في السكن معانا يشوف وش السالفه.
جرس الشقه يرن دخلت وحده من إلي معانا في السكن مرسلهازوجهاتصبرنا(توفت ألحين الله يغفر لها ويسكنها فسيح جناته آمين) وكان الوقت سته صباحا الإثنين ٩/٤/١٤٢٤ سلمت ودخلت إحناعارفين الأمر وشبه متأكدين بس نبي إلي يصرخ بهافي وجوهنا ويقول أبومصعب يطلبكم الحل المهم ناظرت وجيهنا عليها علامة استفهام أخيرا قالت :عظم الله أجركم ،ياالله هذي الكلمه سمعتها كثير وفي ناس كثيربس مهوب لي ولافي أبومصعب انتبهت عندهاإني مااسترجعت (إنالله وإناإليه راجعون اللهم آجرني في مصيبتي وأخلف لي خيرامنها)دخلت الغرفه وقعدت أصيح قام معاذ من النوم على صياحي (ماما)ليش تصيحين ناظرت فيه وسألته ودك نرجع السعوديه رفع صوته لاياماماوبابا قلت :خلاص باباراح لالله وماعاد قدرت أتكلم وبكيت أكثر قال لي حبيبي معاذ مامالاتبكين الله مووحش !يعني متطمن لروحةأبوه عند الله موخايف واناالكبيره إلي أعرف أجر الصابرين قاعده أصيح والله كفكفت دموعي وتصبرت وطلعت للحريم الي جايين يعزون،كان من بينهم مشاعل إلي قالت لي لازم تشوفينه بعد ماطلعت روحه عشان ترتاحين لأن شكله أول من التعب بيكون شين وبعد طلعةالروح يكون أحسن إن شاء الله،إن كنت يامشاعل ماطعتك في الأولى وندمت إن شاءالله ماأفوت الثانيه ،طلبناشوفته وحصل لنامبتغانا الله يوفقك يامشاعل دنياوآخره قولوا(آمين) لماشفته كان في تابوت أبيض والشراشف بيضاء وراسه راجع لوضعه الطبيعي وشعره أسود كثير وعوارضه غزيره ولونه أبيض ومبتسم والله كأنه نايم وعلى بسمه خفيفه الله يختم له بالخاتمه الحسنه،(لا أزكيه ولكن هذا والله مارأيت دون زيادة)ارتحت لماشفته وراحت من مخيلتي الصوره الأخيره إلي شفتهاله في المستشفى ،نمت ذيك الليله بدون أي إحساس بس أتسآل كيف برجع بدونه؟ حلمت حلم جميل وإني جايته في المستشفى وأناإلي أقول له حللني وهويضحك مستانس قمت مستانسه إني وصلت له إلي أبي حتى لومهوب في الحقيقه.
تحياتي للجميع وإنتظروا الحلقة الخامسة عشر والأخيرة والتي تحمل بين طياتها المفاجأة.
الحلقةالخامسةعشروالأخيره/
صعب الإحساس بالوحده والفراق بعدالإجتماع صعب الواحد يتمنى رجوع شي عشان يسوي شيء ليش مايسويه قبل فوات الأوان ،لويرجع أبومصعب كنت أظن سويت أشياء وتلافيت أشياءفي (هالعشر سنين الي مضيناهاسو ا)بس لو ماتنفع بشي الله يرحمك ياأبومصعب ويحللك ويعوضني بصلاح عيالك وبرهم والبركه فيكم (حبايبي)تعلموامن أخطاغيركم وكل زوجين فيكم يتخيلون أنفسهم أبووأم مصعب وأن نهايةأحدهماالتراب قبل الآخر والثاني الحسره والندم على تقصيره مع الآخروش بتسوون بعدها؟أكيد بإذن الله بتعيدون حساباتكم الزوجيه للأحسن بإذن الله.
******************
وفاةأبومصعب بيصيرلهاخمس سنوات وخمس شهور،مصعب صف أول متوسط ، معاذخامس ,مثنى ثاني ،أم مصعب (مدرسه في مدرسة أهلية) وجاء الوقت المناسب الي تغير فيه لقبهامثل ماحب أبومصعب(الله يرحمه)وغيرته إلى(ملكةمملكةالنحل)تدرون ليش؟ لأنهاأعجبتهاملكةالنحل إلي قدرت تديرالمملكه الكبيره بكل دقه ونظام دون وجود رجل معاهاتتمنى إنهاتتصف بصفات ولوقليله من صفات هالملكه و تدعي ربهاإنه يرحم زوجها ويرحمهاإذاآلت إلى ماآل إليه،ويصلح عيالها وإنه يقدرهاإنه مهما إظطرتهاالظروف في حال من الأحوال ماتتخلى عن لقبهاأبداوماتدخل في خليتهافرد آخر غير ساكنيه,طبعا خليتها إلي هي ساكنتها هي وعيالها هي البيت الي بناه أبو مصعب قبل وفاته .أتمنى إنكم إستفدتوا من القصة أبناء وبنات آدم وحواء لأني ما طلعتها من خزائن الذكريات إلا أسأل الله أن ينفع بها آميين والمفاجأة عرفتوا منهي أم مصعب؟لا تحرموها من دعواتكم إن الله يثبتها ويصلح لها عيالها وترحبون بها عضوة جديدة بينكم حبايبي.(جميع الأحداث واقعية دون زيادة مع تغيير فقط في الأسماء الحقيقية )مستقبلي بعد تدبير الله بين يديكم أي نصائح في التربيه لا تحرموني منها إستودعتكم الله الذي لا تضيع ودائعه محبتكم كاتبة القصه هي ملكةمملكة النحل واشكر جميع من تابع هذه القصه الحزينه والرائعه
المواضيع المتشابهه
العرض العادي
