يالاسمك شرف والغيرة عندك سيف واترابك درع من دمعة الايتام
ويالجــودك بحر ويعوم بيه الخير يالبيك أنوجد دين الله والإسلام
********
جدار الهم تضعضع طاح فوكَـ الكَـــاع والام السنين اتهيج التربان
وصفت كل البيارغ ليك تحسد دوم لان شافت وسام الغِيرة الك عنــوان
طاحت وبتعاسة جروح تنزف بيك واخيوط التشلهن مالهن وجدان
ولان عندك اصول ومسكنك للطيـب ولان بيك الشرف متشرف او ولهــــان
ولان جودك يغطي بالكرم هامــــات ولان حظنك يدفي كـل صدر بـــردان
وشافوا بارضك النخلات مبتسمـــات وناعور الورد ما يوم ضل عطشــــان
وشافوا جم حمامة اتصفكَـ الجنحيــن لكت طبعك حديقة وعطرك البســـتان
ولكت جرفك عيون وما تجبها دموع ولكوا عندك نهر بالتضحية غركان
وشافوا جم منارة وقبة بيها النـــور وتـــــاه الليل بيهن والكَمر الــوان
حقهم بالطمع لو طمعوا اصلا بيـك لان كلـــك قيافـــــة ومظهرك اوزان
وحقهم بالحقد لو صاروا يكرهــــوك لان بيك انوجد دين الله والقــــرءان
وحقهم لو كمائن صاروا ينصـبـــون وحق هاي الدول ند صارت وعــدوان
وخططهم مو عجيبة الخابت ابلحضات واصدك لو وكف بيهم دمه الشريـان
لان عرفـــــوا حقيقـة وبيها الك اسرار لكَوا بيك الشرف والنخوة والشجعان
ولكوا بيك المعالــــي ورافع انت الراس وتسحكََـ بالجدم لــو ضحكتك تنخان
شامخ ياعراق براية التوحيد لان اسم الجليــــل برايتك عنوان
لذلك مفتخر وبـــزودي اصرخ دوم انــــــــي ابن العراق وموش ابن فلان
انـي ابن الكرم وابن الشرف والجود وابن رمز الوفه الشمرهن الذرعان
انـي ابن الوكع منحور فوك الكاع انـــي ابن الدليل الصفحة الايمان
انـي ابن الحضني اذراعة بالكلفـــات انـــي ابن الاصيل الضمني بالاحضان
دمه الشريان اسمك والكلوب حـروف اسمك ياعــراق وهالنبض برهــــــان
المواضيع المتشابهه
اسمك بحر والدنع فايض بيه..... ياعراق.... للشاعر احمد رفيش
العرض العادي
