تويت
كوم ياحامي الحميه ندبتك وين الشهم
زينب الليله سبيه اشلون ماعدك علم
كوم هد كبرك يحيدر واطلع الوادي الطفوف
وشوف بعيونك المنضر بيمن اتحيط الالوف
هذه بتك يالمشكر حايره بين الصفوف
حيل ماعدهه اتعثر بجت املاك الرووف
مره تركض للمخيم اتطفي من عده اللهيب
ومره ترجع للمهشم اتكله وسفه يالحبيب
تعوفني ابين الاعادي اوجهي ماشافه غريب
ومااظن ترضاهه خويه ابغيبتك خدري سليب
خويه راح اندب ابونه وراح احجيله الجره
شلون هالوادم دعونه وكالوا احنه الناصره
وحين شافونه وصلنه روعونه ابمجزره
ذبحوا ولياني بويه وكلهه نومه اعله الثره
بويه من غصبن عليه راح اروحن لليسر
وراح اعوف احباب كلبي وتدري مصعب هالامر
وبعد ياحيدر شخبرك صار حادينه الشمر
ابسوطه يتبختر عليه من بعد ذاك الخدر
علهزل هالركبوني ربي ينطيني الصبر
بويه والدمعه بعيوني تنزل وجنهه جمر
وهاي تاليهه يبويه ومني لا لاتعتذر
وحدي بالغربه ذليله ياحسافات العمر
ابو امين الفرطوسي
تعليق