ليالي العشر الاولى شهر الاحزان /9+10

[خالد محمد مهدي الحجار]

آه ياليلة التاسع // شهر الاحزان

**************

ليل طال بلايه غبشه ليلة فراكك يالاكبــــــر

صدمه ماتحمله روحي عله بعادك يمَّه مكَدر

لانهاري شفت روحي وكَلبي كلساعه أيتحسر

الراد يوسف ألي ردَّك موادعك للجبد فسَّــــر

دمعتي جمر أعله خدّي // ولهب نيران

****************

شبه جدَّه بنور وجهه وخلقه أخلاق الرســــاله

الكَمر من علي الاكبرأستحه من ظنوره وجماله

مايهاب الموت كَلبه يواجهه بصبر وبساله

لبوا ليمه نذر روحه وبالدمه صدَّق وصاله

راح من عيني وعماهه // وبجه الوجدان

***************

صال عالجيمان زوده وخاف حتَّه الموت منَّه

أيدّور ركَـــاب الاعــادي فنَّهه لحدوده تدنَّــــه

درس من حيدر نطاهم بيمنتــه تفرج المحنــه

تالــي طــاح وراح منّي وزاد نوح الكَلب ونَّه

ودَّع الروح المصاب // جفه وحرمان

***************

لسانه من العطش خشبه لظه يسعرجنَّه جمره

حتَّه دمعــي لو ألمَّــه مايطَّفــي نــــار صدره

راح خلآني بمراري دمعه نوح ودمعه حسره

نــور وجهه ماأشــوفه بهيبته أتوســد الغبـــره

غاب وغيابه سلاني // وحالي حزنان

***************

روحه ويَّه طيور جنَّه الدار حقهه غادرتني

سكَاهه جدَّه ماي كوثروعافني بدنيه أذبحتني

عتب حالي وياه سولف ليش يبني ماخذتنــي

نسيتني ونسيت عمري ألهمي يايمَّه عفتنـــي

راح ويه النوح ابقه // بدمع طوفان

****************

آه ياليلة العاشر // شهر الاحزان

*********

أخذ بحظانه رضيعه بعد ماجف صدر أمَّه

راد ماي أيروّي ريكَه كَوم ذلَّه ماترحمه

حرمله بسهمه تصدَّه شابكَه بنحره يشمَّه

أخذ عمر الورد منَّه والدمه بجفَّه يلمّه

تالي رده الحضن أمَّه // ورد ذبلآن

*************

شلون لجمة كَلب صعبه عاشت وياهه الليالي

دموعه كامت تلولي وحسره تبجي بصوت عالي

والحلييب أيحن يريده در على فركَة الغالي

عيونه تعمه بسهرهه // ونسه النسيان

******************

صفه حسين أيعاين الهم وحالة خيامه الحزينه

مابقه ناصر ينصره وحده بس الله اليعينه

جرح فوك الجرح ينزف للعمر ظل يدمي بينه

سهم لمثلث بكَلبه عهده يحمي بدمَّه دينه

حر أبي سيد المواقف // روح الاديان

**************

منبعه كل خلق طيِّب أنحنت يم جدمه المفاخر

حيه دينه بدمه نحره وبنبض لكَلوب حاضر

خلَّه دمع العين سلوه وصوت يصدح عالمنابر

مايموت حسين بينه يبقه عايش بالضماير

روَّه شجرة عشك لسمه // ومات عطشان

************

ماعلت للظلم هامه والحياه تشهك أنفاسه

طاح عرش الطاغي ونذل كَبال عزَّه أنحنه راسه

وعاش بالوجدان حاضر ملك كل كَلوب ناسه

وشبك بجروحه العقيده بكربله ثابت أساسه

بأسمه معنه الحب عرفنه // شيب شبّان

*************************************

[ندى الحزينة]

لسانه من العطش خشبه لظه يسعرجنَّه جمره

حتَّه دمعــي لو ألمَّــه مايطَّفــي نــــار صدره

راح خلآني بمراري دمعه نوح ودمعه حسره

نــور وجهه ماأشــوفه بهيبته أتوســد الغبـــره

غاب وغيابه سلاني // وحالي حزنان

الله ادام لنا الله فيض قلمكم
تحيااتي

[خالد محمد مهدي الحجار]

السَّلأمُ عَلَيْكَ يَا أبَا عَبْدِاللهِ ، السَّلأمُ عَلَيْكَ يَا ابْنَ رَسُولِ اللهِ ، السَّلأمُ عَلَيْكَ يَا ابْنَ أمِيرِ المُؤْمِنينَ ، وَابْنَ سَيِّدِ الوَصِيِّينَ ، السَّلأمُ عَلَيْكَ يَا ابْنَ فاطِمَةَ الزّهراءِ سَيِّدَةِ نِساءِ العالَمِينَ ، السَّلأمُ عَلَيْكَ يَا ثَارَ اللهِ وابْنَ ثارِهِ وَالْوِتْرَ المَوْتُورَ ، السَّلأمُ عَلَيْكَ وَعَلَى الارْواحِ الّتي حَلّتْ بِفِنائِكَ ، وَأنَاخَتْ بِرحْلِك عَلَيْكُمْ مِنّي جَميعاً سَلامُ اللهِ أبَداً ما بَقِيتُ وَبَقِيَ الليل والنهار
ممنون لكل فيض ومرور كريم


لاتنسونا بالدعاء
شكرا // ممنون