تويت
نَشـيد الديـن
إمْـنالإمـامَـه = للقـيـامَـه
مـاتِـنِّسي يـحسين= نَحرك نَـشيد الدين
***
يحسين إبْـنشْـأﺓ تکوينَك = من قَـبْـل الـذَر بالأرواح
روحيتَك من روح القُـدره = واحد من خَمْسَـة أشباح
وبْمَکنون الـرَب وعِلـمَه = دمَّك للـعالَـم مِـصبـاح
مرسوم إبْـمِـنْـهاج الباري= ومَحْفـوظ إبْنَص الألواح
للبَـرايـه = دَمَّك آيـه
من نَشْـأﺓ التكويـن= نَحرک نَـشيد الدين
***
إبْدين الهادي الرب الواحد = أنْسَخْهِن کل الأديان
ودين الإسلام أصبَح ثابت =والقَرَّت بيه إنْس وجان
لاکن بَعد الـهـادي الاُمَّـه =حِـرْفَـت منهاج القرآن
عِـزْلَت حيدرعن تنصيبه = والَت زُمْـره إمن الطغيان
وبْوِجودك = وبْجِهودَك
حَـزمَـنـْْحـر الطـاغين= نَحرک نَـشيد الدين
***
شفت الدين إتْـناثَرجِسمَه =والإسـلام أصبَح يـنْـبـاد
بالجَـور وبالحُکم الظالِـم= تِـتْـحَـکََّـم بيـه الأوغـاد
من سُفيـان الچَـف أولاده= جَـلاّد إيْـسَـلمَه الجَـلاد
ثارَت بْـامـرالرَب الواحِـد= شَخْـصيتَك يابـو السجاد
کل وَلائَـك = وإنْـتِـمائك
للـضـارب إبْـسيـفيـن= نَحرک نَـشيد الدين
***
يحسين إنته بْـأمرالباري = مـاترکع للـذِل هيهات
إنتَه السيف القاطِع للرَب= وجروحک رَفَّت رايات
عَلَّمت الناس الحُـريّـه= دَمِّـك يـصنَع حُـريّات
کل قطرﺓ دَم امن دْمومَك = تِـتْـرَتَّل للديـن آيـات
ثَــوره دَمَّـك = تدري بِسْـمَك
يـتْـرَدَّد بْـکل حِـين= نَحرك نَـشيد الدين
***
مِـن مِـثْلَک يحسين إبْـنَـحره= وبْـدَمه أخْـلَص للمعبود
ومِـن مِـثْلَك من گطعوا راسه= صـارالشـاهِـد والمَشهود
ومِن مِـثْلَك باولاده وصُحبه= وبِـعْـياله إعْله الدين يجود
ومِن مِـثْلَك باطفاله الرِضَّع =يـقَـدِّمْـهُـم للبـاري جنود
تُـبْـقَـه قائِـد= کل مُجـاهِـد
وبْـمَـنْـهَـج مـاشيـن= نَحرک نَـشيد الدين
***
چَم عـام المَر إعْلـه الثوره =ودْهـور المَـرَّت ودْهـور
چَِم گبـر إنْـدِثـرَت آثـاره =وگْبـور إنْـزاحَت وگْبـور
وگبرک بيه کل سُـر القُدره= عـالعـالَـم يـسطَع بالنور
عـاصِـمْـة الله القُـدْسِـيّـه = وعْليـه الأفـلأک إتْـدور
والمَـلائِـك = عالأرائِـك
تِشْـبَـح إلَك بالعين= نَحرك نَـشيد الدين
***
گبرك بيـه إتْـلـوذ الـدنيـا = وتْـأمِّـن من چَـف الخوف
ومن کل فَجْ إتْگصده العالم= وتْحِج بيه صفوف اصفوف
وگلوب الذابت بِمْـحَـبتَك = وَيّـه أمْلاك البـاري تطوف
چَن يـوم المحشَـر يَم گبرك = مِـلتَـمِّـيـن وعيني تشفوف
والـخَـلايـق= بالحَـقـايـق
تَوگَـف إلَـك صَفَّـيـن= نَحرك نَـشيد الدين
***
ابو ياسر الكعبي
تعليق