الى راهب ال محمد..عليه السلام

[شاعرة بابل]

نرد اردود لسوالف حزن مزروعة بينة عيون
بيهة نشوف صورة من الالم مدمية المنظر
رسمناهة بدمع ومخططة بأحزان
وكبرنا وهية ويانة بوجع تكبر
طبع بيهة الجروح تهيج بالخاطر سوة
والطبع شيغيرة شلون يتغير؟
بينة اصدور مامتعودة عالحسرات
بس علمنة كل شهكة نفس بالضيم تتحسر
من نهوى الحبيب نضحي كل غالي
ونرخص لخاطر عيونة الذهب و الدر
واذا راد النفس نهديهة وية العين
صوغة وننطي حفنة عهد من دم النحر
طبع بينة الوفا ومانعرف النكران
لان رد الجميل اطباع كلمن حر
هوة هذا الحب الي يكولون عنة
وبالكتب موصوف اشعار ونثر
حبينة وهوينة بلا خجل نحجي
وبمحبوبنة واجب اظن نفخر
ونعلي الصوت ونكول احنة عشاكة
وعلمنة الحبيب وية الكمر نسهر
لان مابي دغش حبنة نتفاخر بيه
من ماي العذ ب انقى وبعد اطهر
حبينة محمد واهل بيتة دهور
ولزمناهم صراط بدربة مانعثر
واحس عبرة تلوج بخاطري المكسور
تريد تكول سرهة وبعد ماتكدر
لان محبوب من بين الاحبة اليوم
مر ذكرى وفاتة وصار المقدر
اوصافة الحلم والزهد والايثار
والسجدة الطويلة ووجهة المنور
كضى سنين عمرة ابين سجن وضيم
وظلم اللارشيد تمادى وتطور
لجن هيهات مامسة الجزع ساعة
حتى الصبر من قلبه الابي اتصبر
اظن بعد الوصف هذا صبح معروف
محبوب القلب موسى أبن جعفر
كاظم غيظ روحة بتقوى وبأيمان
وبزنزانة ظلمة اشرق وازهر
سلام الله على المجتوف بكيودة
والمسموم بيد الكفر والمنكر
ابعثلك سلامي وية كل سجدة
ومن اسمع اذان الفجر لو كبر

[ابن الشاعر]

السلام عليكم
الاخت الفاضله
شاعرة بابل
بوركت وبورك
هذا المداد الرائع
لكم مني كل التقدير

[شاعرة بابل]

وعليك السلام ايها الاخ العزيز
والشاعر الكبير..
احييك واسأل الله ان يوفقك لكل خير
ويبارك فيك ..مع خالص الشكر

[عاشقة السيدة زينب ع]

اللهم صل على محمد وآل محمد الطيبين الطااااهرين
وعجل فرجهم وألعن أعدااااائهم
شكراً لكِ خيه على القصيدة الرااائعة و الجميلة
الله يعطيش ألف عاافية
تسلم أيااااديش على القصيدة

[شاعرة بابل]

بوركتي اختي العزيزة عاشقة السيدة زينب
اسعدني مرورك الكريم..
واشكركِ على التواصل الجميل
مع كل الود..

[محب الرسول]

أحسنتِ شارعتنا القديره

جزاكِ المولى خير الجزاء
في ميزان اعمالك

[شاعرة بابل]

بوركت اخي الكريم محب الرسول
وشكرا على المرور العذب..مع كل الشكر والتقدير